Turkiya qurolli kuchlari 20-aprel kuni Suriya shimolidagi harbiy operatsiya davomida 5 nafar xavfli terrorchini yo‘q qildi. Bu haqda Anadolu nashri xabar berdi.
Xabarda aytilishicha, yo‘q qilingan terrorchilar Kurdiston ishchi partiyasiga aloqador bo‘lgan. Ular Suriya shimolida joylashgan Turkiya harbiy obyektlarida terakt uyushtirishni rejalashtirgan.
“Terrorchi tashkilotlarga qarshi kurashimiz faol davom etadi. Salohiyatimizni kamsitishlariga yo‘l qo‘ymaymiz”, — deyilgan Turkiya Mudofaa vazirligi hodisa yuzasidan eʼlon qilgan bayonotda.
Rasmiylar aksilterror tadbir “Furot qalqoni” operatsiyasi doirasida amalga oshirilganini xabar qilgan. Hududda terrorchi tashkilotlar taʼsiri yuqoriligi inobatga olinib, operatsiya hali ancha davom etishi mumkinligi bildirilgan.
Qurolli kuchlarimiz Suriya shimolida Kurdiston ishchi partiyasi terrorchilariga qarshi amaliyotlarini davom ettirmoqda. “Furot qalqoni” operatsiyasi hududida aniqlangan 5 nafar terrorchi zararsizlantirildi. So‘nggi terrorchi zararsizlantirilgunga qadar unga qarshi kurash davom etadi, — deyilgan rasmiy xabarda.
Maʼlumot o‘rnida, Kurdiston ishchi partiyasi Turkiya, AQSh va Yevropa Ittifoqi tomonidan terrorchilik tashkilotlari ro‘yxatiga kiritilgan. Ushbu partiya so‘nggi 40 yilda Turkiyaga qarshi olib borgan terror kampaniyasida 40 000 nafarga yaqin tinch aholi vakillari, jumladan, ayollar, bolalar va go‘daklar halok bo‘lgan.
Anqaradagi hukumat 2016-yildan beri Suriya shimolidagi chegarasi bo‘ylab Kurdiston ishchi partiyasi terrorchilik koridori shakllanishiga yo‘l qo‘ymaslik va aholining tinch yo‘l bilan hududlarga qaytishini taʼminlash maqsadida aksilterror amaliyotlarini amalga oshirib keladi. Turk hukumati rasman “Furot qalqoni” (2016), “Zaytun novdasi” (2018) va “Tinchlik bahori” (2019) kabi harbiy operatsiyalarni eʼlon qilgan.
Izoh (0)