Turkiya huquq-tartibot idoralari xodimlari mamlakatda terrorchi deb topilgan Kurdiston ishchilar partiyasi(KIP)ga aloqadalikda gumon qilingan 90 ga yaqin kishini qo‘lga oldi, deb xabar bermoqda Anadolu agentligi.
Turkiyaning 18 viloyatida, jumladan, Istanbul va Antaliyada aksilterror amaliyotlari o‘tkazildi.
Agentlikning qayd etishicha, gumondorlar Iroq, Suriya va Turkiyadagi razvedka xizmatlarining razvedka faoliyati tufayli aniqlangan.
1-oktyabr kuni Turkiya Ichki ishlar vazirligining Anqaradagi bosh xavfsizlik boshqarmasi yaqinida terakt sodir etilgandi. Ikki terrorchi kichik furgonda bino yaqinidagi darvoza oldida to‘xtagan. Ulardan biri portlovchi qurilmani ishga tushirib, halok bo‘lgan. Ikkinchisi esa zararsizlantirilgan.
Hujum uchun javobgarlikni KIP a’zolari o‘z zimmasiga oldi. Bunga javoban Turkiya armiyasi Iroq shimolidagi KIP nishonlariga havodan zarba berdi. Ta’kidlanishicha, 20 ta obyekt yo‘q qilingan.
Izoh (0)