АҚШ президенти Дональд Трамп Россия “бутун Украинани эгалламоқчи” эканини айтди. У бу ва бошқа мавзулар ҳақида NBC News телеканалига берган интервьюсида айтиб ўтди.
“Россия бутун Украинадан воз кечиши шарт. Чунки Россия бутун Украинани хоҳлаяпти. Агар мен аралашмаганимда, улар бутун Украина учун жанг қилишарди. Россияга ҳозирги ҳудудлар керак эмас, унга бутун Украина керак”, деди Дональд Трамп.
24 апрель куни Трамп Россия Украинадаги можарони ҳал қилиш жараёнида катта ён беришга рози бўлганини ва Украинанинг бутун ҳудудига даъво қилмаётганини айтди. Кейинроқ у Украинага йўқотган ҳудудларини, жумладан Қримни қайтариш талабларини “бемаънилик” деб атади.
The Wall Street Journal газетасининг хабар қилишича, АҚШнинг Украинадаги можарони ҳал қилиш бўйича таклифлари рўйхатига, хусусан, Қўшма Штатларнинг Қримни Россияга тегишли деб расман тан олиши, Россия Федерациясининг янги ҳудудлар устидан назоратини яширин равишда тан олиши, Украинанинг НАТОга қўшилиш имконияти ҳақидаги мунозараларни кун тартибидан чиқариш каби бандлар киритилган.
Апрель ойида АҚШ президенти Москва қандай ён беришга тайёрлиги ҳақидаги саволга “Урушни тўхтатиш. Бутун мамлакатни босиб олишни тўхтатиш” дея жавоб берган эди. Унинг таъкидлашича, Россия “анча катта ён беришларга” рози. Кейинчалик Америка раҳбари Владимир Путин уни ҳурмат қилишини таъкидлаб, шу сабабли Россия “бутун Украинани эгаллаб олмаслигини” айтди.
“Менимча, айтайлик, у мени ҳурмат қилади ва мен туфайли у бутун Украинани эгаллаб олмаслигига ишонаман, гарчи унинг қарори, танлови бутун Украинани эгаллаб олиш бўлса ҳам”, деди Трамп.
Изоҳ (0)