АҚШ президенти Дональд Трамп мамлакат иқтисодиёти рецессияга дуч келиши мумкинлигини тан олди, аммо у ҳаммаси охир-оқибат яхши бўлишига ишонишини ҳам таъкидлади.
Бу ҳақида Оқ уй раҳбари NBC телеканалига берган интервьюсида айтиб ўтган.
"Ҳамма нарса бўлиши мумкин. Лекин менимча, биз мамлакат тарихидаги энг кучли иқтисодга эга бўламиз", деди у рецессия эҳтимоли ҳақидаги саволга жавобан.
Трамп бу масаладан хавотирда эмаслигини ва АҚШ иқтисоди “ўтиш даврида” эканлигини айтиб, якунда жуда яхши ҳолатга чиқишини қўшимча қилди.
Аввалроқ АҚШнинг собиқ молия вазири Жанет Еллен Financial Times газетасига берган интервьюсида Қўшма Штатлар Трампнинг савдо сиёсати ва у жорий этган божлар туфайли таназзулга юз тутаётганини маълум қилганди.
Унинг таъкидлашича, АҚШ "Хитойдан асосий фойдали қазилмалар етказилишига қаттиқ боғлиқ" ва Хитой импортига ўта юқори тарифларни сақлаб қолиш орқали ўз иқтисодиётининг барча тармоқларини сезиларли даражада заифлаштириши мумкин.
Рецессия (лотинча recessus "чекиниш" сўзидан олинган) — иқтисодиётда (хусусан, макроиқтисодиётда), ишлаб чиқаришнинг нисбатан мўтадил, критик бўлмаган пасайиши ёки иқтисодий ўсиш суръатларининг секинлашишини англатади. Бу атама АҚШда Буюк Депрессия даврида ҳаддан ташқари рамзий маънога эга бўлган "депрессия" сўзини ишлатмаслик учун пайдо бўлган.
Изоҳ (0)