Еврокомиссия Венгрияни Европа Иттифоқининг миграция қоидаларини бузганликда айблаб, Европа адлия судига даъво аризаси топширди. Бу ҳақда EK баёнотида маълум қилинган.
Таъкидланишича, Будапешт Европа Иттифоқининг ноқонуний миграцияга қарши курашиш бўйича умумий сиёсатига путур етказмоқда. Чунки Венгрия 2023 йилда ноқонуний муҳожирларнинг Европа Иттифоқи ҳудудига киришига кўмаклашгани учун турли муддатларга қамалган бир қатор шахсларни муддатидан олдин озод қилди. Шунингдек, уларнинг бир нечтасига бошқа давлатларда жазони ўташни якунлашга рухсат берди. EK “бу ҳукмлар чет элда ижро этилишига ишонч йўқлигини” алоҳида таъкидлади. Бошқача айтганда, Шимолий Африка мамлакатларида уларни пора эвазига қўйиб юборишлари мумкинлигидан хавотир билдирди.
Еврокомиссиянинг ушбу қарори Европа Иттифоқи давлатлари томонидан Европа қонунчилигини бузиш ҳолатларини бартараф этиш бўйича яна 14 та турли тартиб-қоидалар билан бирга эълон қилинди.
Еврокомиссия бундай қарорларни ҳар ой қабул қилади. Улар умумевропа меъёрлари амал қиладиган ҳар қандай соҳага — маданиятдан тортиб оғир саноатгача бўлган йўналишларга тааллуқли бўлиши мумкин.
Изоҳ (0)