Ўзбекистон халқ артисти Юлдуз Усмонова санъаткорларнинг бугунги ҳолати ҳақида мурожаат билан чиқди. Унинг фикрига кўра, бугун кўплаб санъаткорлар ижод қилишдан совиб қолган. Бунинг сабабини эса у муаллифлик ҳуқуқлари атрофидаги чалкашликлар, эски асарлар бўйича очилаётган даъволар ва ижодкорларга бўлган босимлар билан боғлайди.
“Янги қўшиқлар йўқ, чиқмаяпти дейишади. Нега йўқ, деб сўраяпсизларми? Чунки ижодкорларнинг қўшиқлари устидан бирданига даъволар очилмоқда. Орадан йиллар ўтгач, ўша тарихда қолган шеърлар учун шоирлар, уларнинг қариндошлари, ҳатто бошқа яқинлари чиқиб, даъво қилишмоқда. Бу эса санъаткорни ижоддан тўхтатади,” дейди Усмонова.
Унинг айтишича, ўтмишда “Тарона” ва “Пантера” каби продюсерлик марказлари орқали ижод қилган даврларида барча муаллифлик ҳуқуқлари расмийлаштирилган, солиқлар тўланган. Қўшиқлар учун рухсатлар олинган, ҳуқуқий жиҳатдан тартиб-интизом мавжуд бўлган. Энди эса орадан йиллар ўтиб, кўпчилик ижодкорлар суд залларида юришга мажбур бўлмоқда.
Аввал ёзилган шеърга рухсат билан қўшиқ ёзганмиз, ҳуқуқий асослар бор. Лекин бугун кимнингдир хоҳиши билан даъво очилмоқда. Бу ҳолат санъаткорни ижод қилишдан тўхтатади, руҳий тушкунликка олиб келади. Шоирлар орасида ҳам адолатсизлик бор: бири бошқасининг асарини эгаллаган, лекин бугун ўзи даъво қилмоқда, дейди Юлдуз Усмонова.
Юлдуз Усмонова бу борада қонунчиликни қайта кўриб чиқиш кераклигини таъкидлайди.
Анча йиллар олдин шоирлар “шеъримни қўшиқ қилинг” деб эшикма-эшик юришарди. Ҳозир эса ўзлари даъво қиляпти. Шоирларнинг ўзини текширишса, бири-биридан ўғирлаб ётибди. Бугун даъво қилган шоирларнинг ватан ҳақида ёзган биронта нормал қўшиғи борми, сўранг-чи? Ватан учун жонини бериб ёзган нарсаси борми? Йўқ. Фақат тижорий йўналишда ёзишган, дейди хонанда.
У мурожаатини президент, бош вазир ва масъул ташкилотларга йўллаган ҳолда ижодий муҳитда адолат ва тартиб бўлиши, аввалги даврларда тўланган ҳуқуқий ҳужжатлар ҳисобга олиниши, кечиктирилган даъволар эса холисона кўриб чиқилиши лозимлигини айтди.
Изоҳ (0)