Украина президенти Владимир Зеленский Вашингтон Киевга гўёки 500 миллиард долларлик ёрдам бергани ҳақидаги маълумотлар ҳақиқатга тўғри келмаслигини айтди.
Бизда бутунлай бошқа рақамлар мавжуд. Бизда ҳамма нарса жуда аниқ. Уруш бизга 320 миллиард долларга тушди. 120 миллиард — бу биз, Украина халқи, солиқ тўловчилар. 200 миллиард — бу АҚШ ва Европа иттифоқдошлари. Бу қурол-яроғ тўпламлари. АҚШ бизга тахминан 67 миллиард долларлик қурол-яроғ ва 31,5 миллиард долларни бюджетга тўғридан тўғри молиявий ёрдам сифатида берган, дея аниқлик киритди Украина етакчиси.
Шу билан бирга, Зеленский гўёки 500 миллиард долларлик ёрдам ва уни минераллар ёки бошқа ресурслар билан қайтариш ҳақидаги баёнотлар ҳақиқатга тўғри келмаслигини қўшимча қилди.
Алоҳида дастурлар ҳам бўлган, албатта, биз инсонпарварлик ёрдами учун миннатдормиз, аммо ёрдамнинг умумий қиймати 500 миллиард долларни ташкил этди, деб айтиб, уни минераллар ёки бошқа нарсалар билан қайтаришни талаб қилиш мумкин эмас. Бу жиддий гап эмас. Бироқ биз жиддий ҳужжатга тайёрмиз. Бизга хавфсизлик кафолатлари керак, дейди сиёсатчи.
Жорий йилнинг 11 февраль куни АҚШ президенти Дональд Трамп Украина ёрдам эвазига АҚШга ўз ҳудудида қимматбаҳо минералларни қазиб олишга рухсат беришга “деярли рози бўлганини” айтган эди. У уруш билан боғлиқ воқеалар ва эҳтимолий музокаралар бундан кейин қандай ривожланишидан қатъи назар, бундай келишувга умид билдирган.
Мен уларга ноёб ер минераллари кўринишида тахминан 500 миллиард доллар эквивалентини хоҳлашимни айтдим ва улар бунга рози бўлишди, деган эди Трамп ўшанда.
Бироқ 15 февраль куни Трамп маъмурияти Украинага мамлакатнинг нодир ерости бойликларига эгалик ҳуқуқининг 50 фоизини АҚШга беришни таклиф қилгани маълум бўлди, аммо Зеленский ҳужжатни имзолашдан бош тортди.
Зеленский Украина минерал ресурсларининг 50 фоизига бўлган ҳуқуқларни АҚШга бермоқчи эмас
Украина президенти тегишли келишувни имзолашдан бош тортди. У, шунингдек, АҚШ вакиллари билан Украина конституциясига мувофиқ тайёрланган тоғ-кон бўйича келишув бўйича ўз таклифини муҳокама қилди.
АҚШ сенатори Брайан Шац Украина президенти билан учрашувдан сўнг Трампнинг таклифини “яхшилаш зарурлигини” айтди, бироқ тафсилотлар ҳақида гапиришдан бош тортди. У, Зеленскийнинг “келишувнинг бир томонламалиги ҳақидаги даъволари адолатли” эканини таъкидлади.
Хавфсизлик кафолатлари эвазига Украина ресурсларидан фойдаланиш
Трампнинг сўзларига кўра, у Зеленский билан Россия билан бўлажак тинчлик шартномасида хавфсизлик кафолатлари эвазига америкалик инвесторларга Украинадаги нодир металлар конлари ва газ конларига кириш ҳуқуқини бериш бўйича 500 миллион долларлик келишув тузмоқчи.
Ғарбга Украинада фойдали қазилмаларни қазиб олиш ҳуқуқини бериш ҳақида Зеленский 2024 йил кузида АҚШ президентлигига ўша пайтдаги номзодлар Дональд Трамп ва Камала Ҳаррисга тақдим этган “ғалаба режаси”да ҳам айтилган.
3 февраль куни Трамп бу вариант ҳақида яна гапира бошлади, бу Ғарб сиёсатчилари ва оммавий ахборот воситаларида катта шов-шувга сабаб бўлди. 7 февраль куни Зеленский Reuters агентлигига берган интервьюсида АҚШ Украина табиий ресурсларини ўзлаштиришда устуворликка эга бўлишини, чунки “америкаликлар ҳаммадан кўпроқ ёрдам берганини” айтди.
Изоҳ (0)