11 апрель куни Германиядаги Рамштейн базасида Украина иттифоқчиларининг мазкур форматидаги 27-йиғилиши бўлиб ўтди. Унда Европанинг қатор давлатлари Киевга янги ҳарбий ёрдам пакетларини эълон қилди. Шунингдек, Украина армиясини электрон уруш тизимлари билан таъминлаш бўйича янги коалиция тузилди. Унга Берлин раҳбарлик қилади.
Йиғилиш аввалида Владимир Зеленский сўзга чиқиб, иттифоқчиларига миннатдорчилик билдирди. Украина президенти, шу билан бирга, Patriot ҳаво мудофаа тизимлари учун эҳтиёж юқорилигини таъкидлади.
“Украина шаҳарларини баллистик ракеталардан айнан Patriot ҳимоя қила олади. Россия айнан шу йўл орқали тинч аҳолини нишонга олмоқда”, деди Зеленский.
Шу куни Европанинг қатор давлатлари Украинага ҳарбий ёрдам пакетларини эълон қилди. Жумладан, Германия жорий йилда 4 та IRIS-Т ҳаво мудофаа комплекси ва мазкур тизимлар учун 300 та зенит ракета етказиб беради. Берлин, шунингдек, 30 та Patriot ракетаси, 15 та Leopard 1 танки, 25 та Marder пиёда жанговар машинаси ва қўшимча равишда 100 000 артиллерия снаряди юборади.
Буюк Британия эса 450 миллион фунт стерлинг миқдорида ёрдам ажратади. У юз минглаб дронлар, радар тизимлари хариди ва илгари етказилган техникаларни таъмирлаш учун ишлатилади. Лондон томонидан эълон қилинган ёрдам пакетини молиялаштириш учун Норвегия 100 миллион фунт стерлинг беради. Бундан ташқари, ўқ-дорилар ва ҳаво мудофааси тизимлари учун 1 миллиард евро ажратади. Умуман олганда, Копенгаген томонидан 2025 йилда Украина учун 5 миллиард евролик ҳарбий ёрдам дастури амалга оширилади.
Бельгия 1 миллиард евро, Дания эса 900 миллион евролик ҳарбий ёрдам пакетларини эълон қилди. Литва эса ўқ-дори сотиб олиш учун 20 миллион евро ажратишни режалаштирмоқда. Эстония бўлса Украина қуролли кучларига 10 000 артиллерия снаряди, шунингдек, қуруқ таомлар етказиб беради.
Изоҳ (0)