Россия ва АҚШ ўртасида Украинадаги можарони тинч йўл билан ҳал этиш бўйича музокаралар жуда мураккаб кечмоқда. Бу ҳақда Россия президентининг матбуот котиби Дмитрий Песков ма`лум қилган.
“Украина келишуви мавзуси бўйича иш олиб борилаётган асосий йўналиш бу — Россия-Америка алоқаларидир. Шу сабабли ҳозирча америкаликлар билан алоқаларимизга эътиборимизни қаратмоқдамиз. Айниқса, ишлар анча қийин ривожланаётгани сабабли”, деди Кремль вакили.
Шунингдек, Песков Европа давлатларининг Киевга уруш ҳаракатларини давом эттириш учун босим ўтказаётгани борасидаги позициясидан ташвишга тушганини билдирди.
“Киев режими ўзининг анъанавий усулида ҳаракат қилмоқда. Шу сабабли вазият осонликча ҳал бўлмаяпти”, дея қўшимча қилди Песков.
Илгари Россия раҳбарининг матбуот котиби Россия Европа ва Украинадан можарони ҳал қилишга йўналтирилган ҳаракатларни кутаётганини айтган эди.
АҚШ президенти Дональд Трамп маъмуриятида Россия билан муносабатлар масаласида келишмовчиликлар юзага келгани хабар қилинганди. Трамп Байденни Украинадаги можарони келтириб чиқаришда айблаганди
Изоҳ (0)