Украина Президенти Владимир Зеленский Қрим масаласини фақат ўт очиш тўлиқ тўхтатилгандан сўнг муҳокама қилиш мумкинлигини билдирди. Давлат раҳбари АҚШ президенти Дональд Трамп билан Украинанинг Қрим устидан назоратни қайтариш учун етарли қурол-яроғи йўқлиги масаласида ҳамфикр эканлигини таъкидлаган.
“Бу масалаларни кўтариш, ҳудудий масалаларни муҳокама қилиш учун санкциявий, иқтисодий ва дипломатик босим ўтказиш имкониятларимиз бор. Лекин фақат ўт очиш тўлиқ ва сўзсиз тўхтатилгандан кейингина барча масалалар ҳақида гапириш имкониятини беради”, - дея таъкидлаган у брифингда.
Шунингдек, у Украина ҳар қандай форматда, ҳар ким билан ва ҳар қандай вақтда мулоқотга тайёр эканлигини қўшимча қилган. Бунда Украина вақтинча босиб олинган ҳеч қандай ҳудудларни юридик жиҳатдан Россияга тегишли деб тан олмайди ва фақат Украина халқигина қайси ҳудудлар Украинага тегишли эканлигини аниқлаш ҳуқуқига эга.
"Вақтинча босиб олинган барча ҳудудлар - бу Украинадир. Бу Конституцияда мустаҳкамланган ва бу позиция ўзгаришсиз қолади. Дунёнинг аксарият давлатлари бизни бу борада қўллаб-қувватламоқда, ҳатто биз ва Россия ўртасида мувозанатни сақлашга уринаётганлар ҳам”,- деди Зеленский.
АҚШ 17 апрель куни Украина делегациясига Трамп томонидан таклиф қилинган тинчлик режасини тақдим этган. Ушбу ҳужжат АҚШнинг урушни дипломатик йўл билан ҳал қилишга қаратилган “сўнгги таклифи” ҳисобланади. Агар Украина бу режани рад этса, АҚШ Киев ва Москва ўртасидаги воситачилик ролидан воз кечишини маълум қилган.
Режанинг энг баҳсли бандларидан бири — АҚШнинг Қрим устидан Россия назоратини тан олишга тайёрлиги саналади. Зеленский бу борада аниқ позициясини билдирган. У Қрим Украина халқига тегишли эканини ва бу баҳслашмаслигини айтган. Трамп эса буни танқид қилиб, “Қрим кўп йиллар олдин қўлдан кетгани”, Зеленскийнинг сўзлари эса “тинчлик музокараларига зарар етказиши”ни таъкидлаганди.
Зеленский мазкур танқидга жавобан Украина ҳар доим ўз конституциясига мувофиқ ҳаракат қилишини ва ҳамкорлардан, хусусан, АҚШ ўзининг кучли қарорларига мувофиқ ҳаракат қилишига мутлақо ишонишини билдирганди.
Изоҳ (0)