АҚШ президентининг махсус вакили Стив Уиткофф урушни тўхтатиш бўйича Россия президенти Владимир Путин билан музокаралар олиб борди. У музокараларни “ишончли” деб атади, шунингдек, тинчлик келишувидаги “бешта ҳудуд”ни ҳам тилга олди. Бу ҳақда Fox News хабар берди.
У (Путин) билан учинчи марта учрашяпмиз. Охирги учрашув тахминан беш соат давом этди. Ўша пайтда хонада унинг икки асосий маслаҳатчиси Юрий Ушаков ва Кирилл Дмитриев бор эди. Учрашув жуда қизиқарли бўлди ва якунда биз якдил фикрга келдик, деди Уиткофф.
Унинг сўзларига кўра, Россия ва АҚШга бунга эришиши учун “вақт керак бўлган”.
Путиннинг талаби — доимий тинчликка эришиш. Шундай қилиб ўт очишни тўхтатишдан ташқари, биз бу масалага ҳам жавоб топдик, дея таъкидлади Трамп вакили.
Уиткоффнинг маълум қилишича, умумий келишувнинг асоси “беш ҳудуд” атрофида шаклланади.
Тинчлик келишуви шу машҳур беш ҳудудга тааллуқли, лекин бу ундан ҳам кенгроқ масала. Биз бутун дунё тинчлиги учун жуда муҳим бўлган бир нарсанинг остонасида турган бўлишимиз мумкин, деди у.
Шунингдек, сиёсатчи Россия ва АҚШ ўртасидаги муносабатларни ўзгартириш имконияти борлигини айтиб, “бу минтақада ҳақиқий барқарорликни таъминлай оладиган жуда жозибадор тижорий имкониятлар мавжуд”, деб қўшимча қилди.
Уиткофф 11 апрель куни Санкт Петербургда Россия президенти билан учрашди. Томонлар Украинадаги вазиятни ҳал қилишнинг эҳтимолий йўлини муҳокама қилди. Россия томонига кўра, мулоқот 4,5 соат давом этган.
Уиткофф урушни тугатиш контекстида Россия томонидан босиб олинган ҳудудлар ҳақида биринчи марта гапираётгани йўқ. Хусусан, Такер Карлсонга берган шов-шувли интервьюсида у “бу можаронинг энг катта муаммоси тўрт ҳудуд” эканини айтганди. Унинг фикрича, гап “Донбасс, Қрим, Луганск ва яна иккитаси” ҳақида бормоқда.
Reuters агентлигининг ёзишича, АҚШ элчисининг Россия босқинига доир бундай баёнотлари Оқ уй ва республикачилар танқидига сабаб бўлган.
Изоҳ (0)