Сунъий йўлдошдан олинган сўнгги тасвирлар Эроннинг АҚШ томонидан бомбардимон қилинган Фордо ядровий бойитиш заводида ишлар давом этаётганини кўрсатмоқда. Бу ҳақда CNN хабар берди.
Тасвирлар 30 июнь куни Maxar Technologies компанияси томонидан тақдим этилган. Унга кўра, ядровий объектдаги вентиляция шахталари ва ҳаво ҳужумлари оқибатида юзага келган чуқурлар атрофида ҳаракатлар давом этаётгани акс этган. Жумладан, экскаватор, кран ва бир нечта ходимлар кўринган, қўшимча транспорт воситалари қайд этилган.
Американинг Б-2 бомбардимончи самолётлари июнь ойида Эроннинг Фордо ва Натанз ядровий объектларига ўндан ортиқ бункер бомбаларини ташлаганди. АҚШ сувости кемасидан учирилган Tomahawk ракеталари эса Эрон марказидаги Исфаҳон объектига зарба берганди. Massive Ordnance Penetrator бомбалари Фордодаги иккита вентиляция шахтасини нишонга олганди.
АҚШ Илм-фан ва халқаро хавфсизлик институтини бошқараётган собиқ ядро инспектори Девид Олбрайтга кўра, Эроннинг бу фаолияти “зарарларни баҳолаш ва эҳтимол радиацион намуналарни олишдан” иборат. Асосий шахталар устидаги авиаҳужумдан ҳосил бўлган чуқурлар эса очиқ қолмоқда.
“Эронликлар ядро объектларининг асосий кириш йўлидаги бомба ўчоқларини тезда таъмирлаганига гувоҳ бўлдик. Бироқ туннелга кириш йўлларининг бирортасини қайта очиш бўйича ҳали ҳеч қандай ҳаракатлар қилинмади”, деди Девид.
БМТнинг ядровий агентлиги 29 июнь куни Эронга берилган зарбалар унинг ядровий дастурига “тўлиқ зарар етказмаганини ва Теҳрон бир неча ой ичида уранни бойитишни қайта бошлаши мумкин”лигини билдирган. АҚШ президенти Дональд Трамп эса Теҳроннинг ядровий дастурини “тўлиқ ва бутунлай йўқ қилганини” бир неча бор таъкидлаган.
Изоҳ (0)