Эрон, АҚШ ва Исроил ҳужумлари натижасида кўрилган зарарга қарамай, яна бир неча ой ичида уран бойитиш жараёнларини қайта тиклашга қодир бўлади. Бу ҳақда Халқаро атом энергетикаси агентлиги (МАГАТЭ) бош директори Рафаэл Гроссининг CBS News’га берган изоҳига таяниб, Al Arabiya телеканали маълум қилди.
Яҳудий давлати жорий йилнинг 13 июнь куни Эрон ядро ва ҳарбий объектларига зарба бериб, бундан мақсад Теҳрон ядровий қуролга эга чиқишининг олдини олиш эканини даъво қилган эди. Кейинроқ можарога Қўшма Штатлар ҳам тортилиб, АҚШ самолётлари ўнлаб метр ер остидаги Фордо иншоотига зарба беришда қўлланилди. Эрон эса, ўз навбатида, оммавий қирғин қуролига эга чиқиш нияти йўқлигини таъкидлаб келади.
Эрон ядровий дастурининг ҳужумлар натижасида кўрган талафотлари ҳақида ишончли маълумот йўқ. Мамлакат ташқи ишлар вазири Аббос Ароқчи етказилган зарар “жиддий” эканини билдирган, бироқ тафсилотларни очиқламаган. Оқ уй эса ҳужумлар натижасида Эрон ядро дастури “ўн йилликларга ортга сурилгани”ни таъкидлади. Бироқ МАГАТЭ раҳбари бу фикрга қўшилмайди.
“Баъзи объектлар ҳали ҳам сақланиб қолган. Эрон бир неча ой ичида ёки ундан камроқ вақтда бир нечта марказдан қочма машиналарни ишга тушириб, уранни бойитишни бошлаши мумкин”, деди Гросси.
Кузатувчиларни Эрон 408,6 кг оғирликдаги юқори бойитилган уран захираси қизиқтирмоқда. Теҳрон уни Исроил ва АҚШ ҳужумларидан аввал номаълум нуқтага кўчирганига ишонишади.
Манбага кўра, гап 60 фоиз даражада бойитилган уран ҳақида кетмоқда. Бу фуқаролик мақсадларида фойдаланиладиган даражадан анча юқори бўлса-да, қурол ясаш учун лозим бўлган 60 фоиздан анча камдир. МАГАТЭ раҳбари бойитилган уран захиралари қаердалигидан бохабар эканини тан олди.
“Биз бу материал қаерда бўлиши мумкинлигини билмаймиз. Бир қисми ҳужум вақтида йўқ қилинган бўлиши мумкин, бир қисми эса кўчирилган бўлиши мумкин. Бу бўйича аниқлик бўлиши шарт”, деди у.
Бироқ Исроил ва АҚШ зарбаларидан сўнг Эрон парламенти МАГАТЭ билан ҳамкорликни тўхтатишга овоз берди. Шунингдек ташкилот раҳбарининг зарар кўрган объектлар, айниқса уранни бойитиш бўйича асосий марказ бўлган Фордога ташриф сўровини рад этди.
Изоҳ (0)