Эрон олий раҳнамоси Оятуллоҳ Али Хоманаий Исроилнинг ҳужумлари бошланганидан бир неча соат ўтгач, ерости бункерига тушган. Бу ҳақда манбаларга таяниб Iran International хабар берди.
Манбаларга кўра, Хоманаий бўлган объект Теҳроннинг шимоли-шарқидаги Лавизан туманида жойлашган. Олий раҳнамо билан бирга унинг оила аъзолари ҳам бошпанада яшамоқда. Хоманаий Исроилга қарши олдинги операцияларда — 2024 йилнинг апрель ва октябрь ойларида ҳам айнан шу бункерда яширингани айтилмоқда.
Исроил 15 июнь куни Эроннинг Туркманистон чегараси яқинида, яҳудий давлатидан 2,3 минг километр узоқликдаги Машҳад аэропортига зарба берган. Бу билан Хоманаийга ўзини ҳеч қаерда хавфсиз ҳис қила олмаслигини кўрсатмоқчи бўлган, дейди манба.
Reuters’нинг АҚШ ҳукумати ичкарисидаги манбаларига кўра, АҚШ президенти Дональд Трамп Исроилнинг Хоманаийни йўқ қилиш режасига “вето” қўйган. У Эронга қарши кескин чора кўришга фақатгина Эрон АҚШ фуқароларига тўғридан тўғри зарба бергандагина розилик билдиришини айтган.
Бироқ Исроил Миллий хавфсизлик кенгаши раҳбари Сзахи Ҳанегби бу даъволарни рад этиб, уларни “сохта хабарлар мамлакатидан келган уйдирма” деб атаган. Шу билан бирга, Хоманаий Исроил нишонига айланиши эҳтимоли истисно этилмаган. Исроиллик юқори мартабали амалдорлардан бири Оятуллоҳнинг ўлдирилиши Исроил учун “табу эмас”лигини айтган.
Исроил ва Эроннинг ўзаро ҳужумлари 13 июнга ўтар кечаси бошланди. Яҳудий давлати “Исёнкор шер” операциясини олиб бормоқда. Унинг доирасида Исроил қўшинлари Эрон ҳудудидаги ядровий ва ҳарбий объектларга ҳужум қилмоқда.
Эрон олий раҳнамоси фуқароларга йўллаган мурожаатида Исроилнинг Эронга берган зарбаларини жиноят деб атаган. У Исроилни “аччиқ ва даҳшатли тақдир” кутаётганини таъкидлаган. Теҳрон “Ҳақиқий ваъда 3” номли операцияни бошлаган. Унинг доирасида Исроилга юзлаб ракеталар учирилган. Икки давлат бир-бирига ҳужум қилишда давом этмоқда.
Изоҳ (0)