Чеченистон раҳбари Рамзан Қодиров 17 ёшли ўғли Адам Қодировнинг тўйига маҳаллий ва хорижлик юқори мартабали меҳмонлардан кимлар ташриф буюргани айтди. Бу ҳақда у ўзининг Telegram каналида маълумот берди.
Қодировнинг сўзларига кўра, ўғли уйлангани билан табриклаш учун тўйга Эрон, Бирлашган Араб Амирликлари, Туркия ва Қозоғистон элчилари ташриф буюрган. Бундан ташқари Россиядан қуйидаги амалдорлар келган:
- Россия бош вазири биринчи ўринбосари Денис Мантуров;
- бош вазир ўринбосари Александр Новак;
- Россия президентининг Шимолий Кавказ федерал округидаги мухтор вакили Юрий Чайка;
- ЛДПР раиси Леонид Слуцкий;
- Москва вилояти губернатори Андрей Воробев.
Шунингдек, бошқа вилоятлар раҳбарлари, “жаҳон спорти юлдузлари, фан, маданият ва дин арбоблари” келган. Қодиров уларнинг исмини ошкор қилмаган.
Мен уларнинг барчасидан ниҳоятда миннатдорман. Улар нафақат биз билан байрамни нишонлади, балки ўз иштироклари билан уни янада безаб, эсда қоларли ва унутилмас қилди. Шуниси ажойибки, бундай пайтларда атрофимизда ўзимиз қадрлайдиган ва муносабатларимизни эъзозлайдиган инсонлар бўлади...
Буни ҳатто оқсоқолларимиз ҳам таъкидлаб, мазкур тадбирда мамлакатимиз ва жаҳонда ҳурматга сазовор бўлган инсонлар кўплигидан жуда мамнун бўлди. Катта авлоднинг бундай баҳоси ҳам кўп нарсани англатади. Раҳмат сизларга, дўстлар! деган Қодиров.
Маълумот учун, 28 июнь куни Адам Қодировнинг тўйи бўлиб ўтди. 17 ёшли куёвнинг тўйда таққан Jacob & Cо.Billionaire ASHOKA соати омма эътиборини тортди. Унинг қиймати 27,7 миллион долларга баҳоланмоқда.
Бундан ташқари Адам Қодиров тўйига чекланган Mercedes-Benz G-Class STRONGER THAN THE 1980s автомобилида келган. Бундай автомобиллар уч хил рангда 460 нусхада ишлаб чиқарилган. Автомобиль 2025 йил 16 апрелда тақдим этилган.
Унинг Германиядаги бошланғич нархи қарийб 190 минг долларни ташкил этади. 2022 йил март ойида Европа Иттифоқи Россияга 50 минг евродан ортиқ қийматдаги автомобилларни олиб киришни тақиқловчи санкциялар киритган эди.
Изоҳ (0)