Эронлик хакерлар АҚШ президенти Дональд Трамп ёрдамчилариннг электрон почта хабарларини ошкор қилиш билан таҳдид қилди. Бу ҳақда Al Arabiya хабар берди.
“Роберт” тахаллуси остидаги хакерлар Reuters агентлигига 30 июнь ва 1 июль кунлари алоқага чиққан. Улар Оқ уй маъмурияти раҳбари Сюзи Уайлс, АҚШ президенти адвокати Линдси Ҳаллиган, маслаҳатчиси Рожер Стоун ва рақиби Сторми Дэниэлснинг тахминан 100 гигабайт электрон почта хабарлари борлигини айтган.
Хакерлар материалларни сотиш таклифини берган, лекин батафсил режаларини ошкор этмаган. Улар хатлар қандай мазмунда эканини ҳам очиқламаган. АҚШ бош прокурори Пем Бонди бу ҳужумни “ахлоқ меъёрларига зид киберҳужум” деб атаган. Оқ уй ва Федерал қидирув бюроси бунга қуйидагича муносабат билдирган:
“Миллий хавфсизликни бузган ҳар қандай шахс тўлиқ текширилади ва қонунга мувофиқ жавобгарликка тортилади”.
АҚШ кибермудофаа агентлиги CISА ҳодиса юзасидан баёнот бермаган. Эроннинг Бирлашган Миллатлар Ташкилотидаги миссияси ҳам бунга изоҳ бермаган. Теҳрон бир неча бор кибержосуслик содир этганини рад этганди.
Хакерлар дастлаб 2024 йили АҚШ президентлиги сайловлари олдидан оммавий ахборот воситаларига шу каби хабарларнинг илк партиясини тарқатиб юборган эди. Reuters аввалроқ тарқатиб юборилган маълумотларни таҳлил қилган. Жумладан, улардан бири Трамп ва собиқ президентликка номзод кичик Кеннеди номидан адвокатлар ўртасидаги молиявий келишув хати эди. Ушбу материаллар қаторида Трампнинг сайловолди ташвиқоти ва келишув музокаралари муҳокамаси бўлган. Гарчи тарқаб кетган ҳужжатлар 2024 йили маълум даражада ёритилган бўлса-да, улар Трампнинг ғалаба қозонишига салбий таъсир этмаган.
АҚШ Адлия вазирлиги 2024 йил сентябрь ойидаги айблов хулосасида “Роберт” хакерлик операциясини Эрон инқилобий гвардияси бошқарганини даъво қилган. Reuters билан суҳбатда хакерлар бу айбловга изоҳ беришдан бош тортган.
Трамп сайланганидан кейин “Роберт” хакерлари бошқа маълумот тарқатмаслигини маълум қилганди. Аммо гуруҳ июнь ойида Исроил ва Эрон ўртасидаги 12 кунлик урушдан сўнг яна ҳаракатга келган. Бу сафар хакерлар ўғирланган электрон хатлар савдосини уюштиришаётганини ва Reuters “бу масалани ёритишини” хоҳлаётганини билдирган. АҚШ кибермутахассислари 30 июнь куни Америка компаниялари ва муҳим инфратузилма операторлари ҳали ҳам Теҳрон киберҳужуми хавфи остида бўлиши мумкинлигидан огоҳлантирган.
Изоҳ (0)