Халқаро атом энергияси агентлиги (МАГАТЕ) Эроннинг ядро қуролини ишлаб чиқаришга уринаётгани ҳақида аниқ далилларга эга эмаслигини маълум қилди. Бу ҳақда агентлик бош директори Рафаэл Гросси хабар берди.
Гроссининг сўзларига кўра, бу масалада Эрон томонидан яратилган ноаниқлик “доимо ёмон сигнал” ҳисобланади.
Биз сиёсий таҳлилчилар ёки давлат амалдорлари эмасмиз. Шунинг учун ядро қуроли яратиш бўйича фаол дастур мавжудлигини эълон қилиш учун бизга аниқ далиллар керак, биз эса бундайларни кўрмадик, деди Гросси.
Унинг таъкидлашича, ҳеч бир давлат Эрон каби уранни 60 фоизгача бойитмаяпти. Бу эса техник жиҳатдан ядро қуроли ишлаб чиқариш учун зарур бўлган даражага (90 фоизга) яқин. МАГАТЭ раҳбари Эроннинг кўплаб юқори лавозимли амалдорлари у билан суҳбатларда ядро қуроли яратиш исломга зид эканини тан олганини айтди. Бироқ Эрон бу қуролни яратиш учун зарур бўлган “пазл бўлаклари”нинг барчасига эга.
Исроилнинг даъвосига кўра, Эрон нафақат ядро бомбаларини яратиш, балки уларни портлатиш учун зарур бўлган техник тадқиқотлар олиб боришга киришган. Тель Авив май ойида разведка маълумотларига таяниб бу ҳақда АҚШни огоҳлантирган.
Аммо исроилликлар ушбу маълумотларни етказганига қарамай, америкалик расмийлар — жумладан, юқори мартабали разведкачи, яна бир АҚШ расмийси ва икки нафар конгресс вакили ёрдамчиси — Теҳроннинг бомба ясашга қатъий қарор қилганига ишонгани йўқ.
Изоҳ (0)