Эроннинг ерости ядровий иншоотлари шу қадар чуқур жойлашганки, АҚШ қуроллари уларни йўқ қила олмаслиги мумкин. АҚШ разведкасининг собиқ ходими ва ҳарбий эксперт Меттю Шумейкер тегишли фикрни билдирди.
Мутахассисга кўра, Американинг бункерга қарши бомбалари, тахминан, 60 метр чуқурликкача етиб боради. Эрон объектлари эса тахминан 90 метр чуқурликда жойлашган.
Эҳтимол, АҚШ Эроннинг ядровий материалларини ҳам йўқ қила олмас, дейди америкалик эксперт.
Агар АҚШ ҳарбийлари объектларга зарба беришга муваффақ бўлса, у ҳолда ҳудудда шамол туфайли тарқалиши мумкин бўлган “сезиларли кимёвий зарарланиш” хавфи пайдо бўлади. Президент Дональд Трампнинг энг яқин маслаҳатчилари орасида Эронга зарба бериш зарурати бўйича якдил фикр йўқ. Сиёсатчининг ўзи ҳужум қилиш режаларини тасдиқлаган. Бироқ Теҳрон ядро дастуридан воз кечиши эҳтимолини ҳисобга олиб, ҳали якуний буйруқ бермаган.
Исроил ҳарбийлари Эроннинг энг ҳимояланган ядровий иншоотларидан бири — Фордодаги объектни йўқ қилиш ёки вақтинча ишдан чиқариш бўйича бир нечта режага эга. Аммо бу режалар АҚШнинг 30 минг фунтли махсус бомба таший оладиган стратегик самолётлари даражасида кучли эмас. Бу самолётлар ер остидаги объектларга ҳам зарба бера олади.
Исроил армиясида тоғли ҳудудда катта чуқурликда жойлашган объектга самарали зарба бериш учун зарур бўлган арсенал, хусусан, бункер бомбалари ва оғир бомбардимончи самолётлар йўқ. АҚШ эса тегишли қуролларга ва яқин атрофдаги базалардан зарба бериш имкониятига эга.
Трамп яқинда Исроил бош вазири Биньямин Нетаньяху билан суҳбатда зарурат туғилганда шундай қадам кўрсатиши мумкинлигини истисно этмаган. Бироқ ҳозирда АҚШ бундай имкониятни кўриб чиқмаяпти.
Изоҳ (0)