Эрон ядро дастури иштирокчиларига ядровий мажбуриятлар ва АҚШ санкцияларини бекор қилиш юзасидан ўз таклифларни топширди

Эрон «4+1» мамлакатлари гуруҳига АҚШ санкцияларини бекор қилиш ва Теҳроннинг ядро бўйича Қўшма ҳаракатлар режаси келишувига мувофиқ ядровий мажбуриятлари тўғрисида иккита якуний лойиҳани тақдим этди. Бу ҳақда Эроннинг бош музокарачиси Али Бакери Кани Венада журналистларга маълум қилди, деб ёзади «Iran.ru».

Унинг сўзларига кўра, лойиҳалар мазмуни Эрон музокара гуруҳининг барча таклифлари ва позицияларини ўз ичига олади. Шунингдек, у ҳозирда Эрон томонидан тайёрланган ҳужжатларни муҳокамага қўйишга тайёр ёки йўқлиги ҳақида нариги томонлардан жавоб кутаётганини қўшимча қилди.

«Табиийки, нариги томон ҳужжатларни ўрганиши ва тақдим этган лойиҳалар бўйича Эрон Ислом Республикаси билан жиддий музокараларга тайёргарлик кўриши керак», — деди у ва нариги томонлар «имкон қадар тезроқ бир хулосага келиши»га умид билдирди.

У журналистларга шу пайтгача Венада ўтказилган икки томонлама ва кўп томонлама учрашувлар ҳамда 2 декабрь куни бўлиб ўтган музокаралар ҳақида маълумот берди.

«Ушбу учрашувларда биз музокараларнинг марказий мавзулари, хусусан, ноқонуний ва оғир санкцияларни бекор қилиш бўйича ўз фикримизни билдирдик ҳамда ўз позициямизни тушунтириш учун зарур бўлган мезон ва кўрсаткичлар билан ўртоқлашдик», — деди у.

Унинг қўшимча қилишича, учрашувларда ноаниқликларга барҳам бериш ва нариги томоннинг Эрон қарашларига оид саволларига жавоб беришга ҳаракат қилинган.

Эрон вакили, шунингдек, музокаралар олиб борувчи бошқа гуруҳларни «ташқи ўйинчилар»нинг музокараларга аралашишига йўл қўймаслик ҳақида огоҳлантирди. Бакери Кани бу огоҳлантиришни баъзилар тўғридан-тўғри ёки билвосита Қўшма ҳаракатлар режасини имзолаган томонлар ўртасидаги келишувни бузиш учун музокараларга аралашишга ҳаракат қилгани билан изоҳлади.

Маълумот учун, Эрон элчилари ва «4+1» мамлакатлари гуруҳи 29 ноябрь куни Австрия пойтахтида Ядро бўйича қўшма ҳаракатлар режасини қайта тиклашга қаратилган музокараларнинг еттинчи раундини бошлади.

Ядро бўйича қўшма ҳаракатлар режаси деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашган. 2018 йил май ойи бошида АҚШ келишувдан бир томонлама чиқишини эълон қилган ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этганди.