Шимолий Кореянинг Пунгери ядро полигонидаги туннелларни қайта тиклаш ишлари КХДР кетма-кет ядро синовларига тайёрланаётганидан дарак бериши мумкин. Бундай фикрни экспертлар билдирди, деб ёзади «Интерфакс».
Yonhap агентлиги хабарига кўра, яқинда сунъий йўлдошдан олинган фотосуратлар Шимолий Корея ядро полигонидаги фаолликни кўрсатди, у қўшимча ядро синовлари ўтказилишидан далолат бериши мумкин.
Агентлик Вашингтонда жойлашган Beyond Parallel таҳлилий марказига таянмоқда, у энг сўнгги сунъий йўлдош тасвирлари янги иншоотлар қурилаётгани ёки эскилари модификация қилинаётганини кўрсатгани, бу эса объектни бўлғуси синовлар учун қайта тиклаш ишлари олиб борилаётганидан далолат бериши мумкинлигини маълум қилди.
Хусусан, 14 июнь, сешанба куни олинган тасвирлар 4-туннел яқинидаги полигонда янги қурилиш ҳаракатларини кўрсатмоқда.
3-туннелда тахминан тўрт ой аввал бошланган ишлар эса эҳтимол шу пайтгача якунланган ва объект тез-тез тилга олинаётган еттинчи ядро синовига тайёр.
Жанубий Корея ташқи ишлар вазири Пак Чжин 14 июнь куни Шимолий Корея навбатдаги ядро синовига тайёргарликни якунлагани ҳақида фикр билдирган ва энди «фақат сиёсий қарор етишмаётгани»ни айтганди.
Американинг Шимолий Корей абўйича махсус вакили Сон Ким ҳам КХДР тайёргарликни якунлади ва исталган вақтда синовларни ўтказиши мумкин, деб ҳисоблайди.
6 июнь куни МАГАТЭ бош котиби Рафаэл Гросси агентлик полигонда фаолликни қайд этаётгани ва буни ядро қуроли синовларига эҳтимолий тайёргарлик белгиси деб ҳисоблашини айтганди. У агентлик маълумотларига кўра, Шимолий Кореянинг Йонбендаги ядро объектида ишлар давом эттирилаётганини ҳам таъкидлади.
Май ойида БМТ КХДР ўзининг Пунгери ядро полигонини қайта тиклаётган бўлиши мумкинлигини маълум қилганди. Ташкилот тарқатган пресс-релизга кўра, янги қурилиш белгилари сунъий йўлдошдан олинган суратларда 2018 йил — полигон ёпилганидан буён биринчи марта қайд этилган.
Пунгери КХДРдаги энг йирик ядро полигони ҳисобланади. Ғарб ОАВларига кўра, ундан биринчи марта 2006 йилда фойдаланилган. Шунингдек, 2009 йил майида, 2013 йил февралида, 2016 йил январи ва сентябрида ҳамда 2017 йил сентябрида ҳам синовлар ўтказилган.
2018 йил майида КХДР Пунгери синов ядро полигонидаги туннелларни демонтаж қилган эди. Полигоннинг учта туннели ушбу воқеани ёритиш учун КХДРга таклиф қилинган қарийб 20 нафар журналист кўз ўнгида портлатилганди. Айни вақтда ядро қуроли бўйича халқаро экспертлар полигонга қўйилмаган. Сўнгги вақтларда Ғарб ва Жанубий Корея ОАВлари Шимолий Корея ядровий синовлар ўтказишга тайёрланаётгани ва Пунгери ядро полигонининг учинчи туннелига олиб борадиган йўлни тезликда қайта тиклаш устида ишлаётгани ҳақида бир неча бор маълум қилганди. Тахминларга кўра, Пхеньян тактик ракеталарга ўрнатилиши мумкин бўлган кичик ядро ўқини синаб кўриши мумкин. Агар эксперимент амалга ошса, бу Пхеньян учун тўрт ярим йил ичидаги биринчи ядро синови бўлади.
Аввалроқ сунъий йўлдошдан олинган тасвирлар Эрон коинотга ракеталар учиришга тайёрланаётгани эҳтимолини кўрсатаётгани хабар берилган эди.
Изоҳ (0)