Эрон ракета ишлаб чиқариш дастурини кенгайтирмоқда — тадқиқот

Эрон ҳукумати Яқин Шарқдаги кескинлик фонида мамлакатда ракета ишлаб чиқариш объектларини кенгайтирмоқда. Бу ҳақда АҚШ мустақил тадқиқотчилари берган маълумотларга асосланиб, Reuters нашри хабар берди.

Манбада айтилишича, америкалик тадқиқотчилар Эрон ҳарбий объектларининг сунъий йўлдошдан олинган тасвирларини ўрганиб чиққан. Уларда объектлар икки йил олдинги ҳажми ва жойлашувига нисбатан анча ўзгаргани аниқланган.

Сунъий йўлдошдан олинган сўнгги суратлар Эроннинг иккита асосий баллистик ракета ишлаб чиқариш объектларида катта ўзгаришлар бўлганини кўрсатади. Сўнгги ҳафтада турли лавозимдаги уч нафар Эрон расмийси берган маълумотлар ҳам буни тасдиқлаган. Эрон ҳарбийлари ўз шахсини аноним сақлаган ҳолда халқаро матбуотга интервью берган.

Объектларнинг кенгайтирилиши 2022 йил октябрь ойидаги келишувдан сўнг амалга оширилгани тахмин қилинган. Чунки айнан ўша даврда Украина урушида ҳарбий техникалар тақчиллигини сезган Россия Теҳронга мурожаат қилиб, ракеталар сотиб олишга хайрихоҳлигини билдирган. Эрон эса бунга рози бўлиб, ракета ишлаб чиқариш сиғимини экспорт даражасида қайта ташкил этган.

АҚШ сунъий йўлдошлари, асосан, Эроннинг Модаррес ва Хожир ракета ишлаб чиқариш мажмуаларини ўрганган. Объектларни тасвирга олган Planet Labs тижорат сунъий йўлдоши мажмуа ҳудудида 30 дан ортиқ янги биноларни пайқаган. Шунингдек, пойтахт Теҳрон яқинида иккита янги баллистик ракета иншооти топилган.

Монтерейдаги Мидлбери халқаро тадқиқотлар институти ходими Жеффри Льюис сунъий йўлдош тасвирлари орқали Эрон ракета дастури хорижий омил туфайли такомиллашганини айтган. Чунки топилган объект ва қисмларнинг айримлари Эрон ракета саноатига хос эмас.

Аниқланган ҳарбий комплекс биноларининг аксарияти тупроқ уюмлари билан ўраб олингани хабар қилинган. Теҳрон шу йўл билан уларни сунъий йўлдошлардан яширишга ҳаракат қилгани тахмин қилинган.

Мутахассисларнинг таъкидлашича, Эрон аллақачон Яқин Шарқдаги энг йирик ракета арсеналини яратишга муваффақ бўлган. Унинг таркибида 3000 дан ортиқ ракеталар, жумладан, оддий ва ядровий каллакларни ташишга мўлжалланган моделлар ҳам бор.