Трамп Эрон олий раҳнамоси Хоманаийдан ҳаётини сақлаб қолгани учун миннатдорлик билдиришни талаб қилмоқда.
Унинг таъкидлашича, Эрон олий раҳнамоси қаерда яширинганини аниқ билган. Бироқ Исроил ёки АҚШ ҳарбий кучларига унинг ҳаётини тугатишлари учун йўл қўймаган.
“Мен у қаерда яширинганини аниқ билардим ва Исроил ёки АҚШ кучларига унинг ҳаётини тугатишига йўл қўймадим. Мен уни даҳшатли ва шармандали ўлимдан қутқардим ва у Раҳмат президент Трамп! дейишига ҳожат йўқ. Урушнинг сўнгги босқичида мен Исроилдан тўғридан-тўғри Теҳронга йўл олаётган самолётларнинг катта гуруҳини чақириб олишни талаб қилдим. Бу, шубҳасиз, бу жуда катта ҳалокатга олиб келган ва кўплаб эронликлар ҳалок бўлган бўлар эди”, деб ёзган Трамп.
Америка раҳбари, шунингдек, Қўшма Штатлар Хоманаийнинг “ғазаб ва нафратга тўла” баёноти туфайли Эронга қарши санкцияларни юмшатиш бўйича барча саъй-ҳаракатларни тўхтатганини эълон қилди.
Исроил мудофаа вазири Исроил Кац мамлакат 12 кун давом этган урушда Эрон олий раҳбари Оятуллоҳ Али Хоманаийни ўлдирмоқчи бўлганини таъкидлаганди.
Вазир яҳудий давлати Хоманаийни ўлдириш учун Қўшма Штатлардан “рухсат сўрамаслигини” айтган. У Эрон олий раҳнамосини ўлдирмаслик учун АҚШ томонидан таъқиқ қўйилганини рад этган.
“Биз Хоманаийни йўқ қилмоқчи эдик, аммо бунга оператив имконият бўлмади”, деган Кац ўз интервьюсида.
Вазирнинг таъкидлашича, Хоманаий ўз ҳаётига суиқасд қилинишини билган ва ҳарбий қўмондонлар билан алоқани узиб, “жуда чуқур ер остига” яширинган. Кац агар Теҳрон ядровий дастурини давом эттирса, Исроил мамлакатга яна ҳужум қилишини таъкидлаган.
Аммо Эрон олий раҳнамоси уруш пайтида видеомурожаатлар эълон қилган ва унинг ўз генералларидан узилиб қолганини тасдиқловчи далиллар мавжуд эмас. Хоманаийнинг ўлдирилиши можаронинг кескин тус олишига сабаб бўларди. Эронда амалда давлат раҳбари бўлишдан ташқари, олий раҳнамо бутун дунёда миллионлаб шиа мусулмонлари учун олий маънавий етакчи ҳисобланади.
Изоҳ (0)