Туркиянинг Кутаҳя шаҳрида яшовчи 71 ёшли аёл Селма Шахин университетни тамомлаб, график дизайнерга айланди.
Шахин ўз вақтида отасининг моддий қийинчиликлари туфайли мактабни ташлаб ишлашга мажбур бўлган. Ҳозирда унинг икки қизи ва тўрт невараси бор.
Аёл очиқ қабул тизими бўйича ўрта мактабни тугатиб, университетга кириш имтиҳонида етарли балл тўплаганидан сўнг Кутаҳяс Думлупинар университети (DPÜ) қошидаги Тасвирий санъат касб-ҳунар коллежига ўқишга кирди.
График дизайн бўйича икки йиллик дастурни муваффақиятли якунлаган Шахин 27 июнь куни бўлиб ўтадиган битирув маросимида дипломни қўлга киритади. Шахин графика ҳамда дизайнни ўрганишга қарор қилганини айтди, чунки у рассомчиликни яхши кўради ва санъатга қизиқади.
Унинг айтишича, уй бекаси эканлиги унинг ўқишига халақит бермаган, ўқиш масаласида сотувчи бўлиб ишлайдиган турмуш ўртоғи унга катта ёрдам берган.
Аёл, шунингдек, атрофидаги баъзи одамлар унинг ёши катта бўлишига қарамай, университетга боришини ғалати деб ҳисоблашларини айтди:
“Афсуски, атрофимдаги айрим инсонлар университетда ўқишимга салбий муносабатда бўлишди. ‘Шу ёшингда уйда ўтир, университетда нима қиласан?’, деганлар ҳам бўлди. Улар мени бу йўлдан қайтаришган бўлса-да, ўқишни ташламадим, чунки ўқиш ва ўрганиш учун ёш чекловлари йўқ.
Отам молиявий қийинчиликлар туфайли мени мактабга юбора олмади ва мен ўқишни ташлашга мажбур бўлдим. Ўқиш менинг орзуларимда қолди. Ёшларга ҳам, менга ўхшаган ўқишга кирмаганларга ҳам ўрнак бўла олсам, жуда хурсанд бўлардим”, деди 71 ёшли талаба.
Изоҳ (0)