Диплом йўқлиги карьерага нуқта қўйилди дегани эмас, деб ҳисоблайди иш берувчилар. Шунинг учун янги иш қидиришда умидсизликка тушмаслик керак, чунки иш бозорида нарх ва сифатнинг тўғри нисбатини топиш мумкин.
Шахсий ҳайдовчи
Бир қарашда, шахсий ҳайдовчиликка фақат ҳайдовчилик гувоҳномаси талаб қилинади, деб ўйлаш мумкин, лекин аслида бошқа талаблар ҳам бор. Автомобиль бошқариш қобилияти билан бирга, сиздан ўта пунктуал ва масъулиятли бўлиш ҳам талаб этилади — баъзан бир дақиқа кечикиш ойлик маошингизни, ҳатто ишингизни йўқотишингизга олиб келиши мумкин. Мижоз хавфсизлик ва аниқ вақтни қадрлайдиган шахсий ҳайдовчининг меҳнатига муносиб равишда тўлашга тайёр бўлади.
Энага ёки уй хизматчиси
Кўплаб уйларда энага ёки уй хизматчилари оиланинг тўлиқ аъзолари ҳисобланади ва уларнинг ёрдамисиз уй хўжалигини ташкил этишни тасаввур қилиш қийин. Айниқса, энагаларни танлаш жараёни жуда қаттиқ бўлади, чунки ота-оналар фарзандларининг тарбияси ва тақдирини уларга ишониб топширади. Агар сиз бошқанинг уйини ўзингизникидек севиб, болаларга чин дилдан ғамхўр ва меҳрибонлик билан муносабатда бўлишга тайёр бўлсангиз, унда меҳнатингиз шубҳасиз, нафақат моддий жиҳатдан, балки маънавий жиҳатдан ҳам қадрланади.
Шахсий ёрдамчи
Шахсий ёрдамчига йирик корпорацияларда ҳам, кичик компанияларда ҳам талаб кучли. Кўпинча ишга кириш учун суҳбатда иш берувчи таълим даражангиздан кўра, кўникма ва хусусиятларингизга қизиқади: хорижий тилларни билиш, кўп вазифалилик, масъулият, стрессга чидамлилик, мантиқий ва таҳлилий фикрлаш қобилияти ва тезкорлик. Бежизга ёрдамчини раҳбарнинг ўнг қўли дейилмайди — ҳеч бир раҳбар ёрдамчисиз учрашув режасини тузиш билан бир пайтда сафарларда меҳмонхона банд қилолмаган бўларди.
Стюардесса
Бу романтик касб, албатта, махсус маҳоратларни талаб қилади, лекин олий маълумотли бўлиш шарт эмас. Асосий талаблар — стрессга чидамлилик, ташкилотчилик, озода ташқи кўриниш ва, албатта, хушмуомалалик. Яхши ойлик олиш учун аввал бир нечта ўқув парвозларида иштирок этиш керак бўлади. Йирик авиакомпанияда ишлашнинг бир қанча афзалликлари бор: катта маошдан ташқари, қўшимча имтиёзлар ва бонусларга ҳам эга бўласиз, бу баъзан оддий моддий мукофотдан ҳам кўра ёқимли ва фойдали бўлиши мумкин. Шунингдек, хусусий компаниянинг борт хизмати ходимлари сифатида ишлаш имконияти ҳам мавжуд.
Риелтор
Бугунги кунда кўчмас мулк бозори қандай қонунлар асосида ишлаётганини биласизми? Хавотир олманг, бунинг учун олий ўқув юртини битириш шарт эмас. Бундай кўникмаларни сиз тўғридан тўғри иш жараёнида ўрганасиз. Бу соҳада ҳамма нарса юқори малакали мутахассис бўлиш истаги ва энг юқори муваффақиятларга эришишга боғлиқ.
График дизайнер
Сўнгги йилларда бу касб тез суръатлар билан оммалашиб бормоқда. Бу соҳада ниҳоятда кўплаб вазифалар мавжуд: 2D ва 3D анимациялар ва баннерлар яратиш, веб-сайтларни безаш, керакли маҳсулотларни саҳифалаш, қўлланмалар ишлаб чиқиш. Профессионал курслар кўплиги туфайли талаб қилинадиган малакани узоқ муддатли таълимсиз олиш имкони мавжуд. Онлайн ишлаш имконияти эса бу касбнинг афзалликларидан бири ҳисобланади. Бир хилликдан чарчаганлар учун фрилансинг идеал усул бўлиши мумкин.
Театр ва кинода визажист
Санъаткор ва юлдузлар билан ишлайдиган визажистларга моделлар ва мода саноати вакиллари билан чекланган мижозларга эга пардоз усталаридан кўра анча юқори ҳақ тўланади. Албатта, керакли давр ва мавзуга мос образ яратиш учун махсус маҳоратлар керак бўлади, айнан шундай кўникмалар иш берувчилар томонидан қадрланади.
Изоҳ (0)