Бугун, 26 август куни Кореяга ноқонуний равишда ишга юбориш билан шуғулланган Миграция агентлиги ходимлари ушлангани тўғрисида хабар тарқалди. Агентлик мазкур хабар юзасидан муносабат билдирди.
Давлат хавфсизлик хизмати ходимлари агентликнинг икки нафар ходимини жами 56 минг доллар олаётган пайтда ушлаган. Улар хизмат мавқейидан фойдаланиб, бир гуруҳ фуқароларни Кореяга ишга юбориш таклифи билан алдаб, пулини олган. Икки ходим 2024 йилда 80 нафардан ортиқ фуқародан қарийб 700 минг доллардан ортиқ пул олиб, уларни ҳозиргача сарсон қилиб юрган. Ҳолат юзасидан жиноят иши қўзғатилиб, тергов кетмоқда.
Миграция агентлиги мазкур хабар юзасидан муносабат билдириб, жиноятга қўл урган ходимлар ҳаракатларини кескин қоралади.
Агентлик муносабатида 2024 йил 17 октябрдан бошлаб Кореяга Э–9 визаси учун ҳеч қандай танловлар ўтказилмагани келтирилган.
“Айрим ходимлар томонидан йўл қўйилган қоидабузарликлардан кейин, Миграция агентлиги фаолиятида Жанубий Кореяга юбориш билан боғлиқ кадрлар, шу жумладан, Сеулдаги ваколатхонада фаолият юритган барча ходимлар тўлиқ ўзгартирилди. Агентлик ходимлари орасида ўз касбига хиёнат қилган, фуқароларнинг ишончи ва ҳақ-ҳуқуқларини суиистеъмол қилган шахсларнинг ҳаракатлари кескин қораланади”, дейилади манба муносабатида.
Агентлик ўз фаолияти билан боғлиқ шубҳали ҳолатлар ёки қоидабузарликларга гувоҳ бўлган фуқаролардан мурожаат қилишни сўраган.
Изоҳ (0)