Дания пойтахти Копенгаген 17 июнь куни эълон қилинган “2025 йилда дунёнинг яшаш учун энг яхши бўлган шаҳарлари рейтинги”да биринчи ўринни эгаллади. Бу ҳақда CNN хабар берди.
Австрия пойтахти Вена Economist Intelligence Unit (EIU) йиллик рейтингида уч йиллик биринчиликдан сўнг Копенгаген томонидан ортда қолдирилган. The Economist журналининг шўба ташкилоти бўлган EIU соғлиқни сақлаш, таълим, барқарорлик, инфратузилма ва атроф-муҳит каби бир қатор омиллар бўйича дунёнинг 173 та шаҳрини рейтингга киритган.
Барқарорлик, таълим ва инфратузилма бўйича мукаммал балл олган Копенгаген биринчиликни қўлга киритган. Вена эса Швейцариянинг Цюрих шаҳри билан иккинчи ва учинчи ўринларни эгаллаган. Австралиянинг Мелбурн шаҳри тўртинчи ўринга лойиқ кўрилган, Швейцариянинг Женева шаҳри эса рўйхатда бешинчи ўринни забт этган.
Австралиянинг Сидней шаҳри олтинчи ўринга лойиқ кўрилган. Япониянинг Осака шаҳри еттинчи, Янги Зеландиянинг Окленд шаҳри эса саккизинчи ўринни қўлга киритган. Тўққизинчи ўринда Австралиянинг Аделаида шаҳри бўлиб, Канаданинг Ванкувер шаҳри кучли ўнталикни якунлаб берган.
Хўш, нега бу йил Вена биринчи ўринни олмади?
Вена аксарият йўналишларда яхши балл тўплаган бўлса-да, барқарорлик йўналишида унинг баҳоси сезиларли даражада паст бўлган. Копенгаген эса барча жабҳаларда юқори балл тўплаган. Венадаги барқарорлик кўрсаткичининг кескин пасайишига 2024 йилнинг ёзида Тейлор Свифтнинг концертидаги бомба таҳдиди сабаб бўлган. Ўшанда концерт бекор қилинган эди.
2024 йилда бешинчи ўринни эгаллаган Калгари бу йил мамлакат соғлиқни сақлаш тизимидаги “зўриқиш” туфайли Канаданинг учта шаҳри қаторида соғлиқни сақлаш бўйича пастроқ балл олиб, 18-ўринга тушиб кетган. Торонто ҳам бу йил пастроқ ўринни эгаллади, натижада 12-ўриндан 16-ўринга тушиб қолган.
Ўзбекистон пойтахти Тошкент рейтингнинг энг қуйи поғоналарида қайд этилган. У 100 баллик тизимда 50-60 оралиғида балл тўплаган.
2025 йилнинг Глобал яшаш имконияти индекси: Топ 10
- Копенгаген, Дания
- Вена, Австрия
- Цюрих, Швейцария
- Мелбурн, Австралия
- Женева, Швейцария
- Сидней, Австралия
- Осака, Япония
- Окленд, Янги Зеландия
- Аделаида, Австралия
- Ванкувер, Канада
Изоҳ (0)