АҚШ президенти Дональд Трамп Сеулдан Корея Республикасида ижарага олинган йирик ҳарбий базани Америка томонига мулк сифатида ўтказишни сўраш имкониятини кўриб чиқмоқда. Бу ҳақда у Оқ уйда жанубий кореялик ҳамкасби Ли Чже Мён билан учрашувининг бошида журналистлар саволларига жавоб беришда маълум қилган.
“Балки, мен қилмоқчи бўлган ишлардан бири улардан катта ҳарбий базамиз жойлашган ерни бизга мулк сифатида ўтказишни сўрашдир”, деган Трамп.
У йирик ҳарбий база ҳақида гапираётганини тушунтирган.
“Мен ижара шартномасидан қутулиш ва улкан ҳарбий база жойлашган ерни мулк қилиб олиш имкониятини кўришни истардим”, деб таъкидлаган Оқ уй раҳбари.
Трамп Жанубий Кореяда жойлаштирилган АҚШ ҳарбий контингенти сонини қисқартириш эҳтимоли ҳақидаги саволга жавоб беришдан бош тортган.
“Мен бу ҳақда ҳозир гаплашишни истамайман, чунки биз дўст эдик ва дўст бўлиб қоламиз”, деган Трамп.
АҚШ президенти Корея Республикасида 40 мингдан ортиқ америкалик ҳарбий хизматчи жойлашганини эслатиб ўтган.
Бундан аввал АҚШ президенти Дональд Трамп шу йил Шимолий Корея етакчиси Ким Чен Ин билан учрашмоқчи эканини айтганди.
Изоҳ (0)