Ўзбекистон Республикаси Халқ таълими вазирлиги, Олий ва ўрта махсус таълим вазирлиги Касб-ҳунар таълими марказининг «Умумий ўрта таълим мактабларининг 10—11-синф ўқувчиларига ўқув-ишлаб чиқариш мажмуаларида бериладиган касблар бўйича малака талабларига қўшимчалар киритиш тўғрисида»ги қарорига асосан замонавий янги касблар бўйича билим бериш йўлга қўйилмоқда. Мазкур касбларнинг малака талаблари тайёрланиб умумхалқ муҳокамасига қўйилди, деб хабар қилади Халқ таълим вазирлиги.
Бугунги кунда ўқув-ишлаб чиқариш мажмуаларида 51 та касб-ҳунар ўргатилиб келинмоқда. 2019—2020 ўқув йилидан бошлаб ўқувчиларнинг қизиқишларини инобатга олган ҳолда янги касбларни ўргатиш моддий-техника базасига ва педагогик кадрлар салоҳиятига эга бўлган ўқув-ишлаб чиқариш мажмуаларида ташкил этилиши кўзда тутилмоқда.
Янги касблар 10—11–синф ўқувчиларига ривожланиб бораётган меҳнат бозорида ўз ўрнини топишига кўмак беради. Жумладан, мазкур қўшимчалар билан ўқувчиларга аниматор, алюмин ва пластик профилли ром ясовчи уста, график дизайнер, веб-дизайнер, ландшафт дизайнери, мозаикачи, музлатгич тузатувчи, реклама стенди устаси каби янги 26 та касб турларини ўргатиш назарда тутилган.
Ушбу касблар рўйхати Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар, идоралар, йирик иш берувчи корхона ва ташкилотларнинг таклифлари асосида меҳнат бозори эҳтиёжларидан келиб чиққан ҳолда шакллантирилган.
Изоҳ (0)