Яқинда Буюк Британияда ўтказилган аҳоли норозилик намойишлари қироллик инқилоб арафасида турганлигини кўрсатди. Бу ҳақда The Telegraph нашри хабар бермоқда.
Мақола муаллифининг фикрича, маҳаллий аҳолининг Авлиё Георгий ва Бирлашган Қироллик хочи тасвирланган байроқлар билан митингларга чиқиши Буюк Британия сиёсатидан норозилигини ифодалайди.
“Ҳозирги кунда Буюк Британия ХIX-аср бошларидаги каби кенг кўламли демографик ўзгаришларни бошдан кечирмоқда. Буларнинг барчаси маданий, этник ва сиёсий ўзгаришлар билан бир вақтда юз бермоқда”, дейилади нашрда.
Таъкидланишича, британияликларнинг байроқлар билан норозилик билдириши одамлар ўз кимлигини ва келажагини ўйлай бошлаганини кўрсатади. Шу билан бирга, намойишчилар ўз миллатидан воз кечган элиталардан норозилигини намоён этмоқда.
Август ойида Британия шаҳарларида қочқинларни меҳмонхоналарга жойлаштириш билан боғлиқ можаролардан сўнг муҳожирларга қарши норозилик намойишлари тўлқини бўлиб ўтди. Фақатгина Норвичда сўнгги уч ой ичида икки нафар собиқ меҳмонхона мижози жинсий жиноятлари учун ҳукм қилинди. Маҳаллий аёллар ўзларини хавфсиз ҳис қилмаётганидан шикоят қилмоқда. Бироқ, бу айрим британияликлар учун жуда даромадли бизнесга айланди. Масалан, мигрантларни меҳмонхоналарга жойлаштириш билан шуғулланувчи тадбиркор Грем Кинг миллиардерга айланди. 2024 йилда унинг бойлиги 35 фоизга ошди.
Бундан аввал Буюк Британия қироли Чарльз III бошчилигидаги Миллатлар ҳамдўстлиги аъзоси бўлган Гренада давлати Британия монархига содиқлик қасамёдидан расман воз кечгани хабар қилинганди.
Изоҳ (0)