Ўзбекистонлик вояга етмаган ака-ука хорижда қаровсиз қолдирилгани аниқланди, деб хабар бермоқда Ижтимоий ҳимоя миллий агентлиги.
Келтирилишича, ўз ота-онаси томонидан чет элда қаровсиз қолдирилган ака-укалар аниқланиб, Ўзбекистонга қайтарилди. Ватанга қайтган болалар Бухоро тумани “Инсон” ижтимоий хизматлар маркази томонидан назоратга олинди.
Марказнинг ҳуқуқий масалалар бўйича эксперт-маслаҳатчиси томонидан оналик ҳуқуқидан маҳрум қилиш ва алимент ундириш юзасидан фуқаролик судига даъво аризаси киритилди.
Болалар эса Пешку туманидаги Оилавий болалар уйига жойлаштирилди. Уларнинг таълим олиш ҳуқуқини таъминлаш ва ижтимоий мослашувини кучайтириш мақсадида қўшимча фан тўгаракларига жалб қилинди.
Хориждан Ўзбекистонга қайтарилган болалар
2024 йил август сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Изоҳ (0)