IT Park ойига 700 доллар топаётган график дизайнер ҳақида ҳикоя қилди
IT Park график дизайн орқали ойига 700 доллар топаётган навоийлик йигит ҳақида ҳикоя қилди.
Шодмонов Санжар Навоий вилояти, Навоий шаҳрида туғилган. IT соҳасига ўзининг илк қадамларини 22 ёшда қўйган, ҳозирги кунда IT соҳасининг график дизайн йўналиши бўйича малакали мутахассис.
Ҳозирда Шодмонов Санжар 25 ёшда бўлиб, ёш бўлишига қарамай IT Park Навоий вилояти филиалида SMM менежер ҳамда IT марказда график дизайн курси бўйича ўқитувчилик қилади. Шу кунга қадар 100 га яқин ўқувчиларга таълим берган.
Бугунги кунда унинг ўқувчиларининг бир қисми IT компанияларда, яна бир қисми Ўзбекистон ички бозорида ўз-ўзини банд қилган ҳолда фрилансерлик фаолияти билан шуғулланмоқда. Шунингдек, бир неча ўн нафари график дизайнер ўқитувчиси бўлиб фаолият олиб бормоқда.
Санжар марказда ўқувчиларга таълим беришидан ташқари Ўзбекистон ички бозоридаги буюртмаларни ҳам бажариб боради. Ойлик ўртача даромади 500-700 долларни ташкил этади.
Унинг фикрича, жамоавий ишлашнинг асосий афзаллик томонлари ишлар тенг тақсимланиши, барча лойиҳалар ўз вақтида бажарилиши. Одамлар билан бирга ишлашни ва мулоқот қилишни ўрганиш, киришимлилик, малака ошириш, фикр алмашиш каби малака ва қобилиятларни ҳам ривожлантиради.
Санжар келажакдаги режалари Ўзбекистонда IT соҳасини янада ривожлантиришни ва етук IT-мутахассислар етиштириб чиқариб, салоҳиятли кадрларнинг ривожи бўйича Навоий ҳудудини Республика миқёсида 1-ўринга олиб чиқишдан иборат.
Санжарбек ўзининг мисолида иштиёқи бўлган ҳар қандай инсон IT мутахассиси бўлиши мумкинлигини кўрсатиб бермоқда. Асосийси — интилиш, меҳнат қилиш ва ўрганишга бўлган қизиқишдир.
