Массачусетс технология институти олимлари томонидан ўтказилган янги тадқиқотда сунъий интеллектнинг инсон ақлий қобилиятларига таъсирининг “даҳшатли натижалари” аниқланди. Бу ҳақда LADBible нашри хабар бермоқда.
Тажриба давомида 54 нафар талаба иншо ёзиш вазифаларини бажариб, уч гуруҳга бўлинган: биринчилари ChatGPT ва бошқа тил моделларидан фойдалана олди, иккинчилари интернетда қидирув имкониятига эга бўлди, учинчилари эса ҳеч қандай ташқи ёрдамсиз ишлади.
Тадқиқот давомида олимлар электроэнсефалография ёрдамида иштирокчиларнинг мия фаолиятини кузатиб борган. Маълум бўлишича, сунъий интеллектдан мунтазам фойдаланганларда ақлий фаолликнинг сезиларли даражада пасайиши кузатилган. Улар маълумотларни ёмонроқ эслаб қолишган, фикрларни ифодалашда қийинчиликларга дуч келишган ва ақлий юкнинг камайиши белгиларини кўрсатишган. Айниқса, тўрт ой давомида катта тил моделларидан доимий фойдаланишнинг таъсири яққол сезилган.
Иштирокчиларга гуруҳларни алмаштириш таклиф қилинганда, сунъий интеллектдан мустақил ишлашга ўтганлар ақлий функция даражасини тезда тиклай олмадилар. Шу билан бирга, сунъий интеллектсиз ишлагандан сўнг ундан фойдаланишни бошлаган талабалар вақтинча самарадорликни оширдилар, аммо вақт ўтиши билан пасайишни ҳам кўрсатган.
Мутахассисларнинг таъкидлашича, сунъий интеллект фойдали восита бўлиши мумкин, аммо ундан ҳаддан ташқари фойдаланиш таълим ва танқидий фикрлашни ривожлантиришга салбий таъсир кўрсатиши мумкин. Бу, айниқса, бундай технологияларга қарамлик билим сифатининг пасайишига олиб келиши мумкин бўлган таълим муассасаларига тааллуқлидир.
Тадқиқот ақлий ривожланиш билан боғлиқ масалалардан ташқари, экологик жиҳатга ҳам эътибор қаратди. Маълум бўлишича, ChatGPT каби тизимларга ҳар бир сўров катта энергия ресурсларини талаб қилар экан. Масалан, ҳар 10-50 та сўров учун серверларни совитиш учун тахминан 50 мл сув керак бўлади. Ортиқча сўзлар ёки расмиятчиликлар қўшилиши маълумотларни қайта ишлаш ҳажмини ва энергия сарфини оширади.
Бундан олдин ChatGPT британиялик аёлга қўлининг суратини таҳлил қилиб, зудлик билан шифохонага боришни маслаҳат берган эди.
Изоҳ (0)