Мактабгача ва мактаб таълими вазирлиги томонидан ўтказилган танловларининг Республика босқичи синов жараёнлари Самарқанд шаҳрида ташкил этилди. Тақдирлаш маросимида Президент ёрдамчиси Саида Мирзиёева ҳам иштирок этди.
“Турон” мактаб театри танлови
Президент Шавкат Мирзиёевнинг 2024 йил 22 ноябрдаги тегишли қарори асосида ташкил этилаётган “Турон” мактаб театри танловининг туман (шаҳар) босқичи жорий йилнинг 24-28 февраль кунлари бўлиб ўтди. Унда 45 288 та жамоа (362 304 нафар ўқувчи) иштирок этди. Танловнинг ҳудудий босқичи эса 11-29 март кунлари 208 та жамоа (1 664 нафар ўқувчи) ўртасида ўтказилди.
Жорий йил иккинчи маротаба ўтказилаётган “Турон” мактаб театри танлови баҳсларида мактабларнинг 6-11 синф ўқувчиларидан (8 нафар) иборат жамоалар иштирок этди. Жамоалар иккита — “Бизнинг мактаб” таништирув ва савол-жавоб ҳамда “Театр – ибратхона” саҳна спектаклини намойиш этиш шартлари асосида беллашишди.
Бунда иштирокчи жамоалар миллий ва умуминсоний қадриятлар, урф-одат ва анъаналаримизга мос, тарбиявий аҳамиятга эга бўлган асарлардан спектакл кўринишида парчалар ижро этишди.
Танлов жараёнлари таниқли театр актёрлари, соҳанинг малакали мутахассисларидан иборат ҳакамлар ҳайъати томонидан баҳолаб борилди.
“Иқтидор” мактаб ансамбли танлови
“Иқтидор” мактаб ансамбли танловининг туман (шаҳар) босқичи жорий йилнинг 7-11 апрель кунлари 8 890 та жамоа (71 120 нафар ўқувчи) ўртасида, ҳудудий босқичи 14-29 апрель кунлари 208 та жамоа (1 664 нафар ўқувчи) ўртасида ўтказилди.
Ўқувчи-ёшларнинг миллий чолғу санъатига бўлган қизиқишларини оширишга хизмат қилувчи мазкур танловида 6-10 синф ўқувчилари (8 нафар)дан иборат жамоалар иштирок этди.
Жараёнлар Ўзбекистон Республикаси халқ артисти ва хизмат кўрсатган артистларидан иборат санъаткорлар томонидан баҳолаб борилди.
“Регистон” майдонида жам бўлган иқтидор эгалари
17 июнь куни Самарқанд шаҳрида мазкур танловларнинг Республика босқичи жараёнлари бошланди.
Бунда ҳар бир танлов бўйича ҳудудлардан келган 14 та жамоа (ҳар бир ҳудуддан 1 тадан) белгиланган шартлар асосида куч синашади. Баҳслар таниқли санъаткорлар ва соҳанинг малакали мутахассислари томонидан баҳоланади.
Шунингдек, иштирокчи ўқувчилар Самарқанд шаҳридаги тарихий ва маданий обидаларга саёҳат қилишади.
“Турон” мактаб театри танлови баҳслари ҳудуддаги Ҳамид Олимжон номидаги вилоят мусиқали драма театрида, “Иқтидор” мактаб ансамбли танлови баҳслари Нурафшон санъат саройида ташкил этилди.
Танловлар ғолибларини тантанали тақдирлаш маросими “Боқий шаҳар” мажмуасида бўлиб ўтди. Тақдирлаш маросимида Президент ёрдамчиси Саида Мирзиёева ҳам иштирок этди.
“Мен учун фарзандларимизнинг самимий ва беғубор ҳис-туйғуларини ҳамда чақнаб турган кўзларини кўришдан кўра кучлироқ илҳомлантирувчи нарса йўқ.
Кеча Самарқанд шаҳридаги “Боқий шаҳар” мажмуасида айнан шундай, илҳомбахш кун бўлди — республикамизнинг иқтидорли ёшларига бағишлаган ҳақиқий истеъдод байрами ташкил этилди.
Ҳар бир лаҳза ўзгача маъно-мазмун касб этди. “Турон” театр кўрик-танлови ғолибларининг тақдирланиши, “Иқтидор” танлови финалчилари — мактаб ансамблларининг ёрқин чиқишлари юртимизда нақадар ижодий салоҳиятли ва умидли авлод етишиб чиқаётганини кўрсатди.
Қобилиятини, юқори даражадаги маҳоратини намоён этган барча жамоаларни чин юракдан табриклайман!
Ушбу тадбир олдидан Мактабгача таълим вазирлигининг ҳудудий бошқармалари раҳбарларига хизмат автомашиналари топширилди”, деб ёзди Президент ёрдамчиси.
Якуний натижаларга кўра, ғолиб деб топилган жамоа аъзолари хорижий давлатлар (“Турон” мактаб театри танлови ғолиблари — Туркияга, “Иқтидор” мактаб ансамбли танлови ғолиблари — Озарбайжонга) таълим саёҳатига юборилади.
Шунингдек, танловларда 2-3-ўринларни қўлга киритган жамоалар ташкилотчилар томонидан қимматбаҳо совғалар билан тақдирланди.
Танлов ғолиблари билан ушбу ҳавола орқали танишиш мумкин.
Изоҳ (0)