Қирғизистон махсус хизматлари томонидан коррупцияга қарши текширув ўтказилгач, 20 мингдан ортиқ талаба, жумладан, хорижликлар олий ўқув юртларидан четлаштирилди. Бу ҳақда “Интерфакс” нашри хабар қилди.
Қирғизистон олий таълим тизимида коррупцияга қарши кураш бўйича олиб борилаётган чора-тадбирлар доирасида Миллий хавфсизлик давлат қўмитаси (МДҚ) республика олий ўқув юртларида тизимли қонунбузарлик ҳолатларини аниқлаган.
Бунинг натижасида мамлакат бўйлаб 20 мингдан ортиқ талаба ўқишдан четлаштирилди. Уларнинг 13 минг 295 нафари олий ўқув юртларидан ҳайдалди.
Қирғизистон Миллий хавфсизлик бошқармаси маълумотларига кўра, Покистон, Ҳиндистон, Бангладеш, Ўзбекистон, Тожикистон ва бошқа мамлакатлардан келган хорижлик талабалар асосан Ўш ва Бишкек шаҳарларидаги тиббиёт билим юртларида таҳсил олади.
Текширувларда аслида оъқув жараёнида иштирок этмаган, лекин талабалар рўйхатига киритилган ўқувчилар аниқланган. Мазкур фактлар асосида Қирғизистон Жиноят кодексининг “Хизмат ҳужжатларини қалбакилаштириш” моддасида назарда тутилган жиноят бўйича жиноий иш қўзғатилган.
Шунингдек, аниқланган қонунбузарликларга алоқадор олий ўқув юртлари профессор-ўқитувчилари ва бошқарув ходимларидан бўлган шахсларни топишга қаратилган тергов тадбирлари давом этаётгани билдирилган.
Изоҳ (0)