26 август куни Исроилда ҲАМАС кучлари қўлидан гаровдагиларни зудлик билан озод қилиш ҳамда Ғазо секторидаги урушни тугатиш талаби билан оммавий норозилик намойишлари бўлиб ўтмоқда. Бу ҳақда DW нашри хабар берди.
Манбага кўра, намойишчилар 26 август тонгдан бошлаб бутун мамлакат бўйлаб кўплаб йўлларни тўсиб қўйган. Хусусан, Тель-Авив яқинидаги Аёлон тезкор трассаси вақтинча тўсиб қўйилган. Намойишчилар гаровдагиларнинг расмларини кўтарган ва автомобиль шиналарини ёқиб юборган.
Гаровга олинганлар қариндошлари форуми бутун Исроил бўйлаб кўплаб намойишларни ўз ичига олган “Умумий фуқаролик бирдамлиги куни”га қўшилишга чақирган. 26 август тунда Тель-Авив марказидаги Гаровдагилар майдонида йирик намойиш бўлиб ўтиши белгиланган.
Норозилик иштирокчилари Исроил бош вазири Биньямин Нетаньяхуни сиёсий сабабларга кўра урушни атайлаб чўзаётганликда айблашмоқда. Сабаби ўт очишни тўхтатишга Нетаньяхуга кўплаб масалаларда ёрдам берувчи ўнг радикал лагердаги коалицион ҳамкорлари қарши чиқмоқда. Бу эса Нетаньяхунинг ҳокимиятда қолиш-қолмаслигини белгилаб беради.
Исроил мухолифати етакчиси Яир Лапид мамлакат ҳукуматидан ҲАМАС билан урушни тугатиш ва гаровдагиларни озод қилиш бўйича келишув тузишни талаб қилди. Лапид Ynet ахборот порталига берган интервьюсида айтишича, ҲАМАС ва Исроил ўртасида воситачилик қилаётган давлатлардан бирининг юқори мартабали вакили унга:
“Исроил ҳукумати ҳанузгача яқинда тақдим этилган келишув таклифига жавоб бермаган. Бундан қарийб бир ҳафта олдин ҲАМАС АҚШ президенти махсус элчиси Стив Уиткофф баҳорда таклиф қилган режага 98 фоиз рози бўлган”, деган.
Мазкур режада 60 кунга ўт очишни тўхтатиш белгиланган бўлиб, дастлабки босқичда 10 нафар исроиллик гаровдагиларни озод қилиш эвазига фаластинлик маҳбуслар қамоқдан чиқарилиши лозим эди. Воситачи давлат вакили эса Яир Лапидга “Биз тушунмаяпмиз, нега Исроил бизга жавоб қайтармади”, деган.
Изоҳ (0)