Бухоро вилоятидаги хусусий боғчаларнинг бирида уч ёшли бола ток уришидан вафот этди. Бу ҳақда вилоят Прокуратураси хабар берди.
Маълум қилинишича, Бухоро туманида жойлашган ЯТТ Ўлмас Холбоевага қарашли бўлган мактабгача таълим ташкилотида 28 мартда 2023 йилда туғилган Шахрам Шарипов электр токи уриши оқибатида вафот этган. Мазкур ҳолат юзасидан туман прокуратураси томонидан Жиноят кодексининг 116-моддаси 3-қисми билан жиноий иш қўзғатилган.
Ҳолат юзасидан ўтказилган дастлабки терговда мазкур нодавлат мактабгача таълим ташкилоти тарбиячиси М.Д.нинг вазифасига ёши ва индивидуал хусусиятларини инобатга олган ҳолда болаларнинг ҳаёти ва саломатлигини муҳофаза қилиш, техника ва ёнғин хавфсизлиги қоидаларига риоя қилиш каби касбий мажбуриятлар кириши белгиланган бўлса-да, ўз касбига нисбатан бепарво ҳамда ўз вазифаларини лозим даражада бажармагани ва ўзига бириктирилган гуруҳда тарбияланувчиларни қаровсиз қолдиргани аниқланди.
Натижасига кўра мазкур жиноят иши 18 июнда мазмунан кўришлик учун суд муҳокамасига юборилди.
Сирдарё вилоятининг Мирзаобод туманидаги оилавий мактабгача таълим ташкилотида икки ёшли бола вафот этганди. Шунингдек, февраль ойида оилавий нодавлат мактабгача таълим ташкилоти тарбияланувчиси назоратсиз қолиши оқибатида чиқиб кетиб, вафот этган.
Бундан ташқари, Қашқадарёдаги боғчада 2 ёшли қизча назоратсиз қолгани сабаб вафот этгани хабар қилинганди.
Изоҳ (0)