АҚШ адлия вазири ва бош прокурори Пем Бонди камида 20 нафар ходимни ишдан бўшатди. Улар Дональд Трампга қарши ишларни тергов қилишда собиқ махсус прокурор Жек Смитга ёрдам берганди. Бу ҳақда Washington Post хабар берди.
Прокурор февраль ойида Трампга қарши тергов олиб борган амалдорларга нисбатан “сиёсийлаштирилган суд ишларини” текшириш учун ишчи гуруҳ тузганди. Мазкур гуруҳ фаолияти доирасида Жек Смитнинг ҳаракатларини ҳам кўриб чиқиши айтилганди.
Бонди томонидан ишдан бўшатилганлар орасида прокурорлар ва ёрдамчи ходимлар бўлган. Манбаларга кўра, айримлари прокурорлик фаолиятида ҳал қилувчи рол ўйнамаган, балки фақат техник ёрдамчи сифатида фаолият юритган.
Пем Бонди унинг Трампга қарши терговларида иштирок этган камида 20 нафар прокурор ва ёрдамчи ходимларни ишдан бўшатган. Ишдан олинганларнинг айримлари прокурорлик фаолиятида муҳим рол ўйнамаган, балки фақат ёрдамчи вазифасида фаолият юритган бўлиши мумкин.
Жек Смит 2022 йил ноябрдан буён Трампга қарши бир нечта жиноий ишларни, жумладан, махфий ҳужжатларни ноқонуний сақлаш ва 2020 йилги сайлов натижаларини бекор қилишга уриниш бўйича терговларга раҳбарлик қилган. Бироқ Трамп президентлик сайловларида ғалаба қозонгач, бу ишлар тўхтатилган. Чунки амалдаги президентни жиноий жавобгарликка тортиш мумкин эмас. Шу сабабли Жек Смит Трампнинг инаугурациясини кутмасдан, ўз ваколатларини топширган эди.
Трамп 20 январь куни иккинчи бор АҚШ президенти лавозимини эгаллагач, Смит жамоасидан камида 37 нафар ходим ишдан бўшатилган. Шунингдек, 2021 йил 6 январдаги Конгрессга бостириб киришни тергов қилган Адлия вазирлиги ходимлари ҳам ишсиз қолган.
Изоҳ (0)