АҚШ президенти Дональд Трамп Россия бўйича “муҳим баёнот” беришини маълум қилди. У бу ҳақда NBC News телеканалига берган интервьюсида айтиб ўтди.
Трампнинг сўзларига кўра, унинг “Россиядан ҳафсаласи пир бўлган”.
Аммо яқин бир-икки ҳафта ичида нима бўлишини кўрамиз. Душанба куни (14 июлда) Россия бўйича муҳим баёнот бераман, деди сиёсатчи.
Трамп Америка қуролларини Украинага етказиб бериш бўйича “янги келишув” тузилганини ҳам айтди. Унга кўра, АҚШ қуролларини НАТОга жўнатади, альянс эса уларни Украинага етказиб беради ва бунинг учун пул тўлайди. Июнь ойида НАТО саммитида шундай келишувга эришилган.
Биз қуролларни НАТОга жўнатяпмиз ва НАТО уларнинг тўлиқ қийматини қоплаб беради, дея тушунтирди Трамп.
У, шунингдек, Россияга қарши янги санкциялар жорий этиш бўйича якуний қарорни ўзи қабул қилишини таъкидлади.
Бошқача айтганда, агар мен уларни қўлламоқчи бўлсам, бу менинг қарорим. Улар (Конгресс) санкциялар бўйича жуда жиддий ва қатъий қонун лойиҳасини қабул қилмоқчи, аммо бу борадаги якуний қарор президентга тегишли, деди Трамп.
10 июль куни АҚШ давлат котиби Марко Рубио Куала Лумпурда Россия делегацияси билан учрашганини маълум қилган эди. Москва учрашувда Украина бўйича янги таклифлар билдирган. Аммо Рубио тафсилотларни очиқламаган. Фақат можарони ҳал этиш бўйича “йўл харитаси” муҳокама қилинганини айтган.
Биз айрим ғоялар ва фикрлар билан ўртоқлашдик. Мен уларни бугун кечқурун Вашингтонга қўнғироқлар ва мулоҳазалар шаклида етказаман. Эҳтимол, улар кейинги ҳаракатларни режалаштириш учун асос бўлиши мумкин, деган давлат департаменти раҳбари.
Рубио санкциялар масаласига тўхталар экан, Трамп уларни “ҳақиқий имконият” сифатида кўраётганини хулоса қилган.
Изоҳ (0)