Исроил ҳукуматини 1999-2001 йилларда бошқарган Эхуд Барак яқинда Эрон билан бўлиб ўтган 12 кунлик урушга муносабатини билдирди. Сиёсатчи Bild нашрига интервью берди.
Баракнинг фикрича, Эронга қилинган ҳужумда белгиланган мақсадларга тўлиқ эришилмаган:
Бу қуролли кучларимизга — айниқса ҳаво кучлари, разведка ва “Моссад” учун катта ютуқ бўлди. Ҳужум Исроилнинг минтақадаги ва дунёдаги мавқейини мустаҳкамлади — эронликлар наздида ҳам. Бироқ иккита асосий мақсадга тўлиқ эришилмаган.
Эроннинг ҳарбий ядровий дастурига жиддий зарар етказилди, аммо у бутунлай йўқ қилинмади. Эрон техник жиҳатдан юқори билим ва тахминан 400 килограмм бойитилган уран билан ядро қуролини яратиш арафасида турган давлат бўлиб қолмоқда, деди Исроил собиқ бош вазири.
У Эрон ядро қуролини қўлга киритишига “кўпчилик ўйлаганидан ҳам қисқароқ” вақт қолганини айтди. Бундан ташқари, Эрон ҳали ҳам ракеталар ва уларни учириш мосламаларини ишлаб чиқариш имкониятига эгалигини билдирди. Бу эса Исроил билан Эрон ўртасидаги можаро ҳали якунига етмаганини англатади.
Бу янги китобнинг фақат биринчи боби бўлиб, давоми ноаниқ. Урушлар кўпинча олқишлар ва сохта ғалаба билан бошланади, аммо кейинги воқеалар ривожини башорат қилиб бўлмайди, деди у.
Барак келажакдаги эҳтимолий сценарийлардан бири сифатида Эроннинг кутилганидан ҳам тезроқ ядровий давлатга айланишидан хавотирда:
Эрон сўнгги воқеалардан сабоқ чиқариб, ядровий қуролга интилишини тезлаштириши мумкин. Мамлакатнинг ўзини ўзи ҳимоя қилиши бунга асос бўлади, дея таъкидлади у.
Яна бир эҳтимолий вариант — узоқ давом этадиган ҳолдан тойдирувчи уруш бўлиб, унда Исроил ҳарбий-ҳаво кучлари мунтазам равишда Эрон нишонларига ҳужум қилади, ҳаво мудофааси эса Эрон ракета зарбаларини қайтариш билан шуғулланади.
Эхуд Баракнинг айтишича, Эрон ўз навбатида Шимолий Корея ёки Покистон ёрдамида ўзининг ракета кучларини қайта тиклаши мумкин.
Исроил ва Эрон ўртасидаги 12 кунлик уруш
Исроил 13 июндан бошлаб Эронга тинимсиз ҳужум қилиб, унинг ядровий объектлари, мудофаа тизимлари, юқори мартабали ҳарбий амалдорлари ва ядрочи олимларини нишонга олди. Ҳужумлар оқибатида камида 627 киши, жумладан, кўплаб тинч аҳоли вакиллари ҳалок бўлди, деб хабар берди Эрон Соғлиқни сақлаш вазирлиги.
22 июнь куни АҚШ Исроилнинг ҳаракатларига қўшилиб, учта асосий объектга — Фордо, Натанз ва Исфаҳонга авиазарбалар берди. Ҳужумда бункер бомбалардан ҳам фойдаланилди. Марказий разведка бошқармаси бошлиғи Жон Ретклифф операция Эрон ядровий дастурига жиддий зарар етказганини маълум қилди. Зарбалардан кўп ўтмай АҚШ президенти Дональд Трамп Эрон ва Исроил ўртасида ўт очишни тўхтатиш режими кучга кирганини эълон қилди, буни иккала томон ҳам тасдиқлади.
Изоҳ (0)