АҚШ президенти Дональд Трамп кутилмаганда Сенатнинг Россияга қарши янги санкциялар тўғрисидаги таклифини қўллаб-қувватлади. Гап Россиядан нефть сотиб олаётган давлатлардан келадиган барча товарларга 500 фоизлик бож солиш ҳақида бормоқда. Агар бу санкциялар қабул қилинса, улар Россия нефтига қарши глобал эмбарго даражасига чиқиши мумкин. Бу ҳақда Тҳе Times ёзмоқда.
Нашрининг қайд этишича, Трамп илгари Россияга нисбатан янги иқтисодий санкциялар жорий этишдан тийилган, чунки у Владимир Путин билан музокаралар олиб боришга умид қилган эди. Аммо бу ҳафта Оқ уй раҳбарининг риторикаси кескин ўзгарди. Дональд Трамп америкалик ҳамкасбидан норози эканини очиқча айтган.
Айни вақтда, АҚШ Сенати сенаторлар Линдси Грем ва Ричард Блументал томонидан тақдим этилган икки партиявий қонун лойиҳаси муҳокама қилинмоқда. Унга биноан Россиядан энергия ресурслари сотиб олаётган мамлакатлардан келадиган барча товарларга 500 фоиз бож солиниши белгиланган. Трамп аввалроқ бу қонунни “ҳаддан ташқари қатъий” деб атаган бўлса-да, ҳозир уни диққат билан кўриб чиқаётганини таъкидлаган.
Мазкур санкциялар Россиянинг ўзидан кўра, ундан энергия ресурслари сотиб олаётган асосий харидорларига қаратилган иккиламчи санкциялар сифатида кўрилмоқда. Жумладан, Хитой, Ҳиндистон ва Туркия жиддий оқибатларга дуч келиши мумкин. Мазкур чора Россия нефтига қўйилган санкцияларни айланиб ўтишга хизмат қилаётган танкерлардан иборат “соя флоти”ни ҳам фалаж қилиши мумкин.
Ташқи сиёсат тадқиқот институти эксперти Максимилиан Ҳесс буни қуйидагича изоҳлади:
“Россия нефтини сотиб олаётган мамлакатларга 500 фоиз бож солиниши амалда рус нефтига глобал эмбарго қўйилишини англатади”.
Аммо у Трамп бундай қадамни ташлашига шубҳа билан қарайди. Боиси бундай бўлган тақдирда нефть нархи 100 долларгача кўтарилиши мумкин. Ҳессга кўра, Трамп фақат Россиядан келаётган таҳдид иқтисодий йўқотишлардан кўпроқ хавф солади, деб қарор қилса, бу қонунни қўллаб-қувватлайди.
Россияга нисбатан танқидларини кучайтирган Трамп 14 июль куни бу бўйича муҳим баёнот эълон қилмоқчи. У сенаторлар томонидан таклиф этилаётган қонун лойиҳасига тааллуқли бўлиши мумкин.
Республикачи сенатор Линдси Грем ва демократ Ричард Блументал мазкур қонун лойиҳасини апрель охирида тақдим этишган эди. Унда Россиядан нефть сотиб олаётган мамлакатларга 500 фоизлик божхона тўловлари жорий этилиши кўзда тутилган.
ОАВга кўра, Трамп ушбу қонунни имзолашга тайёр. Аммо у санкцияларни жорий этиш ва бекор қилиш жараёнини шахсан ўзи назорат қилишни истамоқда.
Изоҳ (0)