Украинага қарши урушда Россия армияси сафида жанг қилган 66 нафар Ўзбекистон фуқароси ҳалок бўлди. Уруш давомида 118 139 нафар Россия ҳарбийси қурбон бўлган, шулардан 500 дан ортиғи чет эл фуқароларидир. Бу ҳақда BBC ва “Медиазона” нашрлари хабар берди.
Маълумотларга кўра, Россия армияси сафида жанг қилган хорижликлар 28 та давлатдан бўлган. Қурбонлар сони бўйича биринчи ўринда, катта эҳтимол билан, Шимолий Корея фуқаролари туради. Жанубий Корея разведкаси маълумотига кўра, урушда ҳалок бўлган шимолий кореяликлар сони 600 нафарга етиши мумкин. Бироқ бу борада расмий маълумотлар мавжуд эмас.
Хорижлик қурбонлар ичида Тожикистон фуқаролари (72 киши) етакчилик қилмоқда. Иккинчи ўринда Ўзбекистон (66 нафар) фуқаролари туради. Тожикистондан 43 киши ва Ўзбекистондан 46 киши қамоқ жазосини “ноллаштиришга” уринган. Уларнинг аксарияти “Вагнер” хусусий ҳарбий кампанияси билан шартнома имзолаган.
Ҳуқуқ фаоллари фикрича, Россиянинг босқини Марказий Осиёдан келган мигрантларга нисбатан босим ўтказиш воситасига айланган. Улар урушда қатнашиш эвазига, масалан, Россияга кириш тақиқининг олиб ташланиши, фуқароликни тезлаштирилган тартибда олиш ёки депортациянинг бекор қилиниши каби ваъдалар билан алданган. Адвокатлар кўплаб мигрантлар таҳдид орқали Россия Мудофаа вазирлиги билан шартнома тузишга мажбурланганини қайд этган.
Постcовет ҳудудларидан келганлар орасида Грузия фуқароларининг йўқотишлари ажралиб туради — 63 киши. Уларнинг аксарияти 1991–1993 йилларда Грузия назоратидан чиққан Жанубий Осетия ва Абхазия ҳудудларининг аҳолиси ҳисобланади. Кавказдан бўлган кўнгиллилар орасида урушга профессионал ҳарбийлар ва офицерлар ҳам жалб қилинган.
МДҲдан ташқарида ҳалок бўлган чет элликлар орасида Непал (70 киши) етакчилик қилмоқда, 50 нафар непаллик бедарак йўқолган. Непал ҳукумати Россияга ДНК намуналарини юбориб, ўз фуқароларини аниқлашга уринмоқда.
Россия сафида жанг қилганлар орасида Африка давлатлари — Эфиопия, Замбия, Марказий Африка Республикаси, Танзания ва Тогодан фуқаролар ҳам бор. Шри Ланка ҳукуматига кўра, мамлакатнинг камида 288 нафар истеъфодаги ҳарбийси Россия армиясига ёлланган, улардан 16 нафари ҳалок бўлган.
АҚШ разведкаси таъкидлашича, Россия сафида “саноқли” америкаликлар бор, Украина армиясида эса 2–3 мингга яқин америкалик кўнгиллилар жанг қилмоқда. Шунингдек, Россия қуролли тузилмаларида хизмат қилиб, урушда ҳалок бўлган 54 нафар Украина фуқароси аниқланган. Улар уруш бошланиши чоғида Украина назоратида бўлган ҳудудларда доимий рўйхатда турган шахслардир.
Изоҳ (0)