АҚШ президенти Дональд Трамп Бразилияда ишлаб чиқарилган товарлар импортига 50 фоизлик солиқ солишини маълум қилди. Бу ҳақда BBC хабар берди.
Трамп бу қарорини ижтимоий тармоқда эълон қилган ва Бразилияга расмий хат юборган. Унда Трамп Бразилияни АҚШ технология компанияларига “ҳужумлар” уюштирганликда айблаган. Шунингдек, у собиқ Бразилия президенти Жаир Болсонаруга қарши судни бекор қилишни талаб қилмоқда. 2019—2022 йилларда Бразилияни бошқарган Болсонару 2023 йил январь ойида давлат тўнтаришига уринишда айбланиб, судланмоқда.
Бразилиянинг амалдаги президенти Луис Инасиу Лула да Сильва Трампнинг савдо божларига “жавоб қайтарилишини” маълум қилган. У Трампни мамлакат суд тизимига аралашмасликка чақирган.
АҚШ президенти, шунингдек, шу ҳафта бошида Лула билан Болсонару устидан суд жараёни ҳақида баҳслашганди. Ўшанда Лула Бразилия ҳеч қандай “аралашувни” қабул қилмаслигини айтган. Хусусан, Лула шундай деган: “Ҳеч ким қонундан устун эмас”.
Бразилияга йўлланган мактубда Трамп мамлакатнинг собиқ президенти Болсонару ҳақида ижобий фикр билдириб, уни “жуда ҳурмат қилишини” билдирган. Унга кўра, президентга қарши давом этаётган суд жараёни “халқаро шармандаликдир”.
Шу ҳафтада АҚШ дунёнинг турли мамлакатларига, жумладан, Япония, Жанубий Корея ва Шри Ланка каби савдо ҳамкорларига янги божлар белгилаган. Улар 1 августдан кучга киришини айтиб, президент мамлакат раҳбарларига 22 та мактуб йўллаган. Аммо Бразилияга юборилган хабар анча кескинроқ бўлиб, илгари бу мамлакат товарларига 10 фоизлик бож солинган эди.
Трамп мактубда Бразилия ҳукуматини “эркин сайловлар ва америкаликларнинг асосий сўз эркинлиги ҳуқуқларига қарши маккорона ҳужумларда”, жумладан, “АҚШ ижтимоий тармоқларини цензура қилиш”да айблаган.
Бразилия илгари Илон Маскнинг Х платформасини вақтинча блоклаганди. Сабаби платформа 2022 йилги Бразилия президентлик сайловлари ҳақида нотўғри маълумот тарқатаётган аккаунтларни блоклашдан бош тортган. Июнь ойида Бразилия Олий суди ижтимоий тармоқ компаниялари ўз платформаларида жойлаштирилган контент учун жавобгарликка тортилиши ҳақида қарор чиқарган.
Изоҳ (0)