Россия президенти Владимир Путин АҚШ президенти Дональд Трамп ва Эрон вакиллари билан ўтказилган ёпиқ музокаралар давомида Эроннинг уранни бойитишдан бутунлай воз кечишини кўзда тутувчи ядро келишувига ўз қўллаб-қувватлашини билдирди. Бу ҳақда Европа ва Исроил расмийларига таяниб, Axios нашри хабар берди.
“Путин ънол бойитишъ ғоясини қўллаб-қувватлайди. У эронликларни америкаликлар билан музокараларда ижобий натижага эришиш учун шу йўналишда ишлашга ундади. Эронликлар эса бу вариантни кўриб чиқмасликларини айтишди”, дейди Европадаги манбалардан бири.
Бошқа манбалар аниқлаштиришича, Россия президенти сўнгги ҳафталар ичида Теҳрон ҳукуматига бундай чақириқ билан “бир неча бор” мурожаат қилган.
Исроиллик расмий шахс ўз мамлакати раҳбарияти бундан хабардор эканини билдирган. Шунингдек, Путин яқинда телефон орқали суҳбатлашганда Франция президенти Эммануэл Макронга Эрон ядро дастури бўйича ўз нуқтаи назарини баён этган.
Axios маълумотларига кўра, Россия Эрондан бойитилган уран захираларини олиб чиқиб кетишни ва бунинг эвазига атом электр станциялари учун таркибида 3,67 фоиз уран бўлган ёқилғи, шунингдек, илмий мақсадлар учун чекланган миқдорда 20 фоизлик уран етказиб беришни таклиф қилмоқда.
Украинага қарши урушда Россия Федерацияси билан ҳамкорлик қилишига қарамай, Эрон Исроил билан муносабатлар кескинлашган пайтда Москва етарлича фаол қўллаб-қувватламаганидан норози бўлган.
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)