Украина президенти Владимир Зеленский Россия билан музокаралар ўтказиш ҳозирча режалаштирилмаганини билдирди. Бу ҳақда у Римда бўлиб ўтган Украинани тиклаш бўйича конференциядан сўнг маълум қилди.
Зеленскийга кўра, Киев, Москва ва Вашингтон ўртасидаги тўлиқ музокаралар фақат Истанбулда эришилган асирлар алмашинуви якунлангандан кейингина амалга ошиши мумкин.
Иккинчи учрашувда келишилган масалаларни охирига етказишимиз керак. Яъни Истанбулда келишилган алмашинувлар якунланиши зарур. Шундан кейингина делегациялар учрашувга тайёргарликни раҳбарлар даражасида муҳокама қилиши мумкин, деган Украина президенти.
У урушни ҳақиқатдан тугатиш ва тинчлик музокараларида сезиларли натижага эришиш учун айнан президентлар даражасидаги учрашувга тайёргарлик муҳимлигини таъкидлади.
Айтганимдек, биз ҳар қандай форматга тайёрмиз. Бироқ энг мақбул вариант бу Украина—Россия—АҚШ раҳбарлари даражасидаги форматдир. Бундай учрашувда фақат сўзлар эмас, балки аниқ кафолатлар янграши керак, деди президент.
Зеленский музокаралар ўтказиладиган жой ҳақида ҳозирча гапиришга эрта эканини айтди. Шу билан бирга, у ўз ҳудудида учрашув ўтказиш таклифини берган Ватиканга миннатдорлик билдирди. Шунингдек, музокараларни ташкил этиш бўйича Австрия, Швейцария ва Туркиядан ҳам таклифлар келиб тушганини маълум қилди.
У Россия раҳбари Владимир Путиннинг “урушни чўзишга уринаётгани”ни яна бир бор таъкидлади:
Биз ва ҳамкорларимизнинг разведка маълумотларига кўра, Россия бу урушни чўзмоқчи. Путин тинчликка эришиш имкониятларидан воз кечмоқда. У уруш ва қотилликларга қарам бўлиб қолган ва фақат куч билан тўхтатилиши мумкин. Шу сабаб мудофаамиз етарлича кучли бўлиши керак, деган Зеленский.
Украина ҳисоб-китобларига кўра, келаси йили Россия урушга 300 миллиард долларгача маблағ йўналтириши мумкин. Бироқ Зеленский санкциялар босими Кремлнинг бу урушни молиялаштириш имкониятларини тўхтатишига ишонади.
Истанбулдаги тинчлик музокаралари
2025 йил 16 май куни Истанбулда Россия ва Украина делегациялари Туркия иштирокида учрашув ўтказган. Бу 2022 йилдан бери икки давлат ўртасидаги илк тўғридан тўғри музокара бўлган. Мазкур учрашув олдидан Путин тўғридан тўғри музокаралар ўтказишни таклиф қилган.
Бунга жавобан Зеленский Россия билан музокараларга тайёрлигини тасдиқлаган ва 15 май куни Путинни Туркияда шахсан кутишини айтган. Украина президенти берган ваъдаси устидан чиқиб, музокаралар учун Истанбулга ташриф буюрган. Бироқ Россия президенти музокаралар учун Туркияга бормаган.
28 май куни Украина президенти Владимир Зеленский АҚШ президенти Дональд Трамп иштирокида Путин билан учрашишга тайёрлигини билдирган. Бироқ июль ойига келиб, бундай учрашув ҳали амалга ошгани йўқ.
2 июнь куни Истанбулда музокараларнинг иккинчи раунди бўлиб ўтган. Учрашувда асирлар ва ҳалок бўлган ҳарбийларнинг жасадларини алмашиш бўйича келишувга эришилган. Туркия ва Украина ташқи ишлар вазирлари президентлар даражасидаги учрашув зарурлигини таъкидлаганди.
Изоҳ (0)