АҚШ мис импортига 50, дори-дармонларга 200 фоиз бож солишини маълум қилди

АҚШ президенти Дональд Трамп 8 июль куни мис импортига 50 фоиз, дори-дармонларга эса 200 фоиз бож солинишини маълум қилди. Бу ҳақда CNN хабар берди.

Жорий этилиши режалаштирилаётган бу янги тарифлар қачон кучга кириши номаълум.

“Энди навбат мисга. Мис импортига 50 фоиз бож жорий этамиз”, деди Трамп Вазирлар маҳкамаси йиғилишида.

Бу Трамп ўзининг иккинчи президентлик муддати давомида жорий қилган тўртинчи трансчегаравий божи ҳисобланади. Ҳозирда импорт қилинадиган аксарият автомобиллар ва автомобиль эҳтиёт қисмлари учун 25 фоизлик, пўлат ва алюминий учун эса 50 фоизлик тариф амал қилмоқда. АҚШ президенти февраль ойида мис импорти устида текширув ўтказиш тўғрисида буйруқ берганди.

Мис турли хил товарлар, жумладан, электроника, машина ва автомобилларнинг муҳим таркибий қисмидир. Унга қўйилган божлар бу турдаги товарларни америкаликлар учун қимматроқ қилади. АҚШ 2024 йили 17 миллиард долларлик мис импорт қилган. У Чили металлининг энг йирик хорижий харидори саналди. Чили 2024 йилда АҚШга 6 миллиард долларлик металл жўнатган.

Мис нархи Трамп ушбу қизил металлга бож жорий этишини айтганидан кейин 38 фоизга кўтарилиб кетган. Нью Йоркдаги мис фьючерслари 15 фоизга ошиб, бир фунт учун 5,68 долларга етган. Экспертларнинг айтишича, мисдан фойдаланадиган бизнеслар учун 50 фоизлик бож жуда катта солиқ бўлади.

Шунингдек, АҚШ президенти 8 июль куни дори-дармонларга “тез орада” 200 фоизлик бож солиниши ҳақида ҳам эълон қилган. Аммо тариф кўпроқ фармацевтика компаниялар АҚШга кўчирилмагунча бир мунча вақт кучга кирмаслиги айтилган.

Биринчи президентлик даврида дори-дармонлар импортини божлардан озод қилган Трамп бир неча ойдан бери бу маҳсулотларга тариф жорий этишга ваъда бериб келмоқда. Бироқ ҳозиргача бу борада аниқ чоралар кўрилмаганди.

Президентнинг таъкидлашича, Қўшма Штатлар дори-дармон ишлаб чиқаришда бошқа мамлакатлар ёрдамига таянмаслиги лозим. Шу боис кўпроқ маҳаллий дори-дармон ишлаб чиқаришга эътибор қаратилади.

Трамп 7 июль куни савдо божларини 1 августга қадар тўхтатиб туришини маълум қилганди. Апрель ойида қисқа муддатга киритилган ушбу ставкалар 9 июлда тикланиши режалаштирилганди. Президент, шунингдек, давлат раҳбарларига август ойидаги янги тариф ставкалари қандай бўлиши ҳақида мактублар йўлламоқда.