АҚШ президенти Дональд Трамп 12 июль куни мамлакатнинг энг йирик савдо ҳамкорлари бўлган Мексика ва Европа Иттифоқи маҳсулотларига 30 фоиз бож солишини маълум қилди. Бу ҳақда CNN хабар берди.
Трамп бу қарор ҳақида Truth Social тармоғида пост эълон қилиб, Еврокомиссия раҳбари Урсула фон дер Ляйенга мактуб йўллаган.
“АҚШ Европа Иттифоқи билан йирик савдо дефицитларига эга бўлишига қарамай, ташкилот билан ишлашни давом эттиришга тайёр. Биз янада мувозанатли ва адолатли савдо билан олдинга силжишга қарор қилдик”, деган Тармп.
АҚШ президенти 7 июлдан бери дунё мамлакатлари маҳсулотларига 40 фоизгача савдо ставкалари жорий этиб келмоқда. ЕИ ва Мексикага қўлланаётган божлар 1 августдан бошлаб амал қилади. Трамп иттифоқ ва Мексика расмийларига йўллаган мактубида барча импортларга 30 фозилик тариф амал қилиши билдирилган. Аммо “тармоқ тарифлари”, жумладан, автомобилларга қўйиладиган солиқлар бундан мустасно. Уларга 25 фоизлик бож солиниши таъкидланган.
“ЕИ экспортига 30 фоизлик бож солиниши Атлантиканинг иккала томонидаги таъминот занжирлари, корхоналар ва истеъмолчиларга зарар етказади. Ташкилот иттифоқ манфаатларини ҳимоя қилиш учун барча зарур чораларни кўради. Шу жумладан, агар керак бўлса, мутаносиб қарши чоралар кўрилади”, деган фон дер Ляйен.
Фон дер Ляйенга кўра, АҚШ тарифларига қарши чоралар, жумладан, 24,54 миллиард долларлик экспорт август ойи бошигача кечиктирилади. Европа расмийлари, шунингдек, Трамп божларига қарши чораларнинг “иккинчи рўйхатини” ишлаб чиққани таъкидланган.
Айни пайтда, Мексикадан келтирилган маҳсулотлар АҚШга божсиз кираётганди. Бунга Трампнинг биринчи президентлик даврида келишилган “АҚШ—Мексика—Канада шартномаси” сабаб эди.
Трамп Мексика президенти Клаудия Шейнбаумга йўллаган мактубида фентанилнинг Қўшма Штатларга кириб келишини тўхтатиш мақсадида мамлакатга бож жорий этилганини айтган.
“Мексика бизга чегарани қўриқлашда ёрдам бериб келади. АММО унинг бу иши етарли эмас”, деган Трамп.
Мексика иқтисодиёт вазири Марсело Эбрард 11 июль куни Қўшма Штатлар билан бўлган йиғилишда янги тариф ставкалари “адолатсиз” эканини таъкидлаб, мамлакат бунга “рози бўлмаслигини” билдирган.
Изоҳ (0)