АҚШ президенти Дональд Трамп 1 августдан бошлаб Канададан кириб келадиган товарларга 35 фоизлик бож жорий этишини маълум қилди. Бу ҳақда BBC хабар берди.
Икки давлат олдинроқ савдо бўйича янги келишувга эришиш учун шу яқин кунларга муддат белгилаб олганди. Қўшма Штатлар президенти 10 июнь куни Канада бош вазири Марк Карнига мактуб йўллаб, унда яқин келажакда мамлакатга қандай савдо тарифлари қўлланишини айтган. АҚШ аллақачон Канаданинг баъзи товарларига умумий 25 фоизлик бож жорий қилган. Мамлакат ҳозирда Трамп мъмуриятининг пўлат, алюминий ва автомобилга қўйилган савдо тарифларидан азият чекмоқда.
Трамп шу ҳафта бошида мамлакат савдо ҳамкорларининг аксариятига 15 ёки 20 фоизлик ялпи божлар жорий этган. Тез орада Европа Иттифоқига ҳам шу каби тарифлар жорий этилишини ҳам таъкидлаганди. У шу ҳафта АҚШнинг 20 дан ортиқ савдо ҳамкорларига, жумладан, Япония, Жанубий Корея ва Шри Ланкага расмий хат йўллаган. Канада каби мамлакатнинг бошқа савдо ҳамкорларига ҳам ушбу божларни 1 августгача жорий этилиши айтилган.
Ушбу сўнгги тариф таҳдиди Канада—АҚШ—Мексика келишуви билан қамраб олинган товарларга нисбатан қўлланиши аниқ эмас. Канада ўз товарларининг 3/4 қисмини АҚШга сотади. У мамлакатнинг автомобиль ишлаб чиқариш маркази ва йирик металл етказиб берувчиси ҳисобланади. Мактубда айтилишича, 35 фоизлик тарифлар ушбу соҳаларга амал қилмайди.
Қўшма Штатлар президенти божларни “Канаданинг Штатларга фентанил оқимини тўхтатмагани, мамлакатнинг АҚШ сут етиштирувчи фермерларига жорий қилган йиғимлари ва икки давлат ўртасидаги савдо тақчиллиги” билан изоҳлаган.
“Агар Канада фентанил оқимини тўхтатиш учун ҳаракат қилса, биз, эҳтимол, бу хатга тузатиш киритиш ҳақида ўйлаб кўрамиз. Бу тарифлар мамлакатингиз билан муносабатларимизга қараб ижобий ёки салбий томонга ўзгариши мумкин”, деган Трамп.
Трамп Мексикадан ташқари Канадани ҳам АҚШга “жуда кўп одамларнинг ва фентанилнинг кириб келишига” йўл қўйганликда айблаган. АҚШ божхона ва чегара назорати маълумотларига кўра, Вашингтонга кириб келаётган фентанилнинг атиги 0,2 фоизи Канада билан чегарада, қолган деярли барчаси Мексика билан чегарада мусодара қилинади.
Изоҳ (0)