Исроил Эроннинг уран қазиб олиш фаолияти АҚШ зарбалари натижасида зарар кўрганини, аммо у бутунлай йўқ қилинмаганини таъкидламоқда. Яҳудий мамлакат вакили Эроннинг “ҳар қадами кузатув остида эканини” маълум қилди.
Агар уран қазиб олиш ишлари қайта бошланса, Исроил янги зарбалар беришдан қайтмайди, деди яҳудий давлати расмийси.
Оқ уй матбуот котиби Анна Келли NBC News телеканалига берган баёнотида шундай деди:
АҚШ президенти Дональд Трамп кўп марта айтганидек, “Ярим тун болғаси” операцияси Эроннинг ядровий объектларини бутунлай йўқ қилган. Унинг қатъий етакчилиги туфайли бутун дунё хавфсиз жойга айланган.
Таъкидланишича, яҳудий разведка маълумотлари туфайли Эроннинг ядровий иншоотларига ҳужум қилишга қарор қилинган. Теҳрон бойитилган “уранни қуролга айлантиришга шошилинч ва яширинча” киришган.
Исроил разведка маълумотларини АҚШ президенти билан ҳам баҳам кўрган. Бироқ мамлакат Вашингтоннинг розилигисиз ҳам Эронга зарба беришга тайёрланмоқда. Амалдор разведка маълумотлари манбаси ҳақида аниқ маълумот бермаган.
Эрон эса ядро қуроли яратмоқчи эканини рад этиб келмоқда. Эрон ташқи ишлар вазири Аббос Ароқчи АҚШ зарбаларидан бир кун олдин берган интервьюсида “ҳар бир давлат тинч мақсадларда уранни бойитиш ҳуқуқига эга эканини” айтганди.
Бу ўз олимларимизнинг ютуғи. Бу миллий ғурур ва қадр-қиммат масаласи, деган Ароқчи.
Изоҳ (0)