Россия Суперкубоги баҳсидан сўнг Москванинг “ЦСКА” клуби ярим ҳимоячиси Аббосбек Файзуллаев ўзининг жамоадаги келажаги ҳақида фикр билдирди.
Ғалабадан сўнг журналистнинг “Бу сизнинг ‘ЦСКА’даги сўнгги ўйинингиз бўлиши мумкинми?” деган саволига Файзуллаев қуйидагича жавоб берди:
Бу мавзуда ҳеч нарса дея олмайман, чунки ўзим ҳам билмайман, — дея футболчининг сўзларини келтирди Championat нашри.
Шунингдек, у “Ўзбекистон терма жамоаси билан ЖЧ йўлланмасими ёки ‘ЦСКА’ билан қўлга киритилган иккита совринми (Россия Кубоги ҳамда Суэркубоги)” деган саволга шундай деди:
Ўзбекистон терма жамоаси билан Жаҳон чемпионатига чиқиш — энг катта орзу. Аммо “ЦСКА” билан қўлга киритган иккита соврин ҳам мен ва оилам учун жуда муҳим. Уларни солиштира олмайман — ҳар бири алоҳида қадрли.
Аввалроқ ОАВда Аббосбек Файзуллаев ёзги трансфер ойнасида Москва клубини тарк этиши мумкинлиги ҳақида хабарлар тарқалган эди. Унга Туркиянинг “Башакшеҳир” клуби жиддий қизиқиш билдирмоқда. Маҳаллий журналистларнинг хабар беришича, 21 ёшли ўзбекистонлик футболчи Истанбул клуби сафига ўтишга рози бўлган ва ҳозирда клублар унинг эҳтимолий трансфери борасида музокара ўтказмоқда.
Маълумот учун, Қозон шаҳридаги “Ак Барс Арена” стадионида бўлиб учрашувда “ЦСКА” “Краснодар” устидан 1:0 ҳисобида ғалаба қозонди. “Армиячилар” ушбу ғалаба орқали ўз тарихида саккизинчи бор Россия Суперкубогини қўлга киритди. Бу борада клуб фақатгина “Зенит”дан (9 марта) ортда қолмоқда.
Изоҳ (0)