Дональд Трамп маъмурияти ташқи сиёсатга ёндашувни ўзгартириш мақсади билан мазкур корпусда меҳнат қилаётган 1 107 нафар маҳаллий ва 246 нафар хорижий хизмат ходимларини ишдан бўшатмоқда. Расмийлар бу қарорни “ички операцияларни соддалаштириш ва дипломатик устуворликларга эътиборни кучайтириш” нияти билан изоҳлаган.
Давлат департаментининг ходимлари сони умумий ҳисобда 18 минг нафарни ташкил этади. Ҳозирча уларнинг 3 мингга яқинини қисқартириш режалаштирилган. Мазкур рақамлар ўз ихтиёри билан ишдан бўшаган ходимларни ҳам ўз ичига олади.
Расмийларга кўра, ишдан бўшатиш ташаббуси асосий бўлмаган, бир-бирини такрорловчи ва самарасиз бўлимларга тааллуқли бўлиб, “тежамкорликни ошириш” мақсад қилинган.
Президент Трамп бу ислоҳотни ўзининг “Аввало Америка” сиёсати билан изоҳлаган бўлса-да, танқидчилар мазкур қадам АҚШнинг Хитой ва Россия каби рақибларга қарши дипломатик салоҳиятига жиддий путур етказишини таъкидламоқда.
“Трамп ва давлат котиби Марко Рубио яна Америка хавфсизлигини заифлаштирмоқда”, деди демократ сенатор Тим Кейн.
Оқ уйнинг давлат аппаратини торайтириш ташаббуси ҳукумат идоралари ва бошқа органларнинг кенг тузилмаларини қамраб олади.
Изоҳ (0)